Կիրակի Լոնդոնի «Ալբերտ Հոլ» սրահում կայացել է կինոաշխարհի ամենահեղինակավոր մրցանակաբաշխություններից մեկը՝ Կինոյի և հեռուստատեսային արվեստների բրիտանական ակադեմիայի մրցանակի շնորհման 73-րդ արարողությունը, որին ներկա են եղել բազմաթիվ աստղեր:
Ինչպես նշում է dailymail.co.uk-ը, հյուրերի շարքում է եղել նաև հոլիվուդյան գերաստղ Ալ Պաչինոն, որը, սակայն, անհարմար դրության մեջ է հայտնվել՝ ընկնելով կարմիր գորգի վրա:
Նշվում է, որ 79-ամյա Պաչինոյին ուղեկցել է երիտասարդ ընկերուհին՝ Մեյթալ Դոհանը, որը, տեսնելով` ինչպես է դերասանն ընկնում, վախեցել է, սակայն կինն արագ կողմնորոշվել է ու Ալ Պաչինոյին օգնել վեր կենալ:
Բարձրանալուց հետո «Կնքահայրը» ֆիլմի աստղը շրջվել է լրագրողների և հավաքվածների կողմը՝ ձեռքերի շարժումով ցույց տալով, որ իր հետ ամեն ինչ կարգին է:
Աղբյուրը հավելում է, որ Պաչինոն «Իռլանդացին» ֆիլմում Ջիմի Հոֆայի կերպարը մարմնավորելու համար առաջադրված է եղել «Երկրորդ պլանի լավագույն դերասան» անվանակարգում, սակայն չի հաղթել: Այս անվանակարգում մրցանակը շնորհվել է Բրեդ Փիթին («Մի անգամ Հոլիվուդում»):
Ինչպես ավելի վաղ հայտնել էր Tert.am-ը, Սեմ Մենդեսի «1917» ֆիլմն արժանացել է միանգամից յոթ մրցանակի՝ հաղթելով «Լավագույն ֆիլմ», «Լավագույն ռեժիսոր», «Լավագույն բրիտանական ֆիլմ», «Հատուկ վիզուալ էֆեկտներ», «Լավագույն կինեմատոգրաֆիա», «Լավագույն արտադրական դիզայն» և «Լավագույն ձայն» անվանակարգերում:
Ինչ վերաբերում է «Լավագույն դերասան» և «Լավագույն դերասանուհի» անվանակարգերին, ապա մրցանակի են արժանացել ամերիկյան աստղեր Խոաքին Ֆենիքսն ու Ռենե Զելվեգերը:
«Երկրորդ պլանի լավագույն դերասանուհի» անվանակարգում հաղթել է Լորա Դերնը («Ամուսնական պատմություն»), իսկ երկրորդ պլանի լավագույն դերասան է ճանաչվել Բրեդ Փիթը («Մի անգամ Հոլիվուդում»): Քանի որ Փիթը ներկա չի եղել միջոցառմանը, նրա փոխարեն մրցանակը ստացել է նրա խաղընկերուհի Մարգո Ռոբին:
Հայկական արմատներով բրիտանացի դերասան, ռեժիսոր Էնդի Սերկիսը պարգևատրվել է կինոոլորտում ունեցած զգալի ավանդի համար:
