Իրանը լույս հունվարի 8-ին 22 բալիստիկ հրթիռ է արձակել Իրաքում տեղակայված ամերիկյան ռազմակայաններից երկուսի ուղղությամբ, սակայն հրթիռները միտումնավոր չեն հարվածել իրենց թիրախներին, ինչի արդյունքում ԱՄՆ-ն նվազագույն վնասներ է կրել: Այս մասին գրում է Daily Mail պարբերականը՝ արևմտյան հետախուզական ծառայություններում իր աղբյուրներին հղումով:
Քաջատեղյակ աղբյուրների փոխանցմամբ՝ Իրանն իր հարվածներն այնպես է հաշվարկել, որ որևէ ամերիկացի կամ իրաքցի զինծառայող չզոհվի: Այդ նպատակով երկրի զինվորական հրամանատարությունը միտումնավոր հրթիռներն իրենց բուն թիրախին չի ուղղել, ինչն էլ հնարավորություն է տվել խուսափել Միացյալ Նահանգների հետ հակամարտության հետագա թեժացումից: Ըստ աղբյուրների, եթե իրանական կողմն ուղղակիորեն ավիաբազաներին հարվածեր ու մարդկային զոհեր լինեին, ռազմական գործողությունների սկսումն անխուսափելի կլիներ:
Պարբերականը հիշեցնում է, որ հունվարի 3-ին Վաշինգտոնի իրականացրած հատուկ գործողության ընթացքում Բաղդադում իրանցի գեներալ Ղասեմ Սոլեյմանիի սպանությունից հետո Թեհրանը խոստացել էր ջախջախիչ պատասխան տալ:
Սակայն արբանյակից արված լուսանկարները փաստում են, որ Իրանն իրական պատերազմի մեջ ներքաշվելու ցանկություն չունի, ուստի նախընտրել է նվազագույն վնասով հարվածներ հասցնել ամերիկյան օբյեկտներին:
Լուսանկարներում երևում է, որ մի քանի հրթիռ չեն պայթել: Հրթիռներից մի քանիսն ընկել են Էրբիլում ԱՄՆ հյուպատոսարանից ոչ հեռու, ինչը նշանակում է, որ ցանկության դեպքում Իրանը կարող էր խոցել հյուպատոսարանի շենքը, բայց չգնաց այդ քայլին:
ԱՄՆ պետդեպի մի պաշտոնյա CNN-ի հետ զրույցում ասել է, որ այդ հարվածով Իրանը հետևյալ «մեսիջն» էր հղում՝ մենք կարող էինք դա անել, բայց չարեցինք:
ԱՄՆ կառավարության մեկ այլ աղբյուր էլ նշել է. «Ակնհայտ է, որ նրանք ցանկացան պատասխան տալ, սակայն չցանկացան իրավիճակը բարդացնել»:
Պենտագոնի պաշտոնյաների կարծիքով՝ Թեհրանը նվազագույն վնաս հասցրած հարվածներով հստակ «մեսիջ» հղեց Վաշինգտոնին:
Մերձավոր Արևելքում իրավիճակը թեժացել է դեկտեմբերի վերջին Սիրիայում և Իրաքում շիայական «Քաթաիբ Հեզբոլլահի» օբյեկտներին ամերիկյան զորքերի հարվածից հետո: Դրանից հետո հարյուրավոր շիա մուսուլմաններ Բաղդադում հարձակվել էին ԱՄՆ դեսպանատան վրա, իսկ հունվարի 3-ին Վաշինգտոնի իրականացրած հատուկ գործողության ընթացքում սպանվել է իրանցի գեներալ Ղասեմ Սոլեյմանին:
Լույս չորեքշաբթի Իրանի հեղափոխության պահապանների կորպուսը հայտարարել է գեներալի սպանության համար վրեժխնդրության գործողություն սկսելու մասին՝ հրթիռակոծելով Իրաքի արևմուտքում գտնվող ամերիկյան «Այն ալ-Ասադ» ռազմակայանը:
Ավելի ուշ իրանական Press TV հեռուստաալիքը հայտնել էր, որ Իրաքում ԱՄՆ ռազմաբազաների հրթիռակոծման հետևանքով 80 մարդ է զոհվել: Ամերիկյան կողմը հերքել է զոհերի մասին տեղեկությունը:
