Armenpress.am-ը գրում է.
Պետական բյուջեի պակասուրդի ֆինանսավորումը 2020-ին կիրականացվի այս պահի դրությամբ գործող կառավարության արտաքին վարկերով, բյուջետային աջակցության վարկեր չեն ներգրավվի, արդյունքում ակնկալվում է, որ 2020-ի տարեվերջին արտաքին վարկերի գծով պարտքի մնացորդը կկազմի շուրջ 4.4 մլրդ դոլար: «Արմենպրես»-ի հաղորդմամբ՝ այս մասին ասաց ՀՀ ֆինանսների նախարարության պետական պարտքի կայունության վարչության հաշվառման և սպասարկման բաժնի պետ Արտակ Մարությանը՝ 2020թ. փոխառությունների ծրագրի ներկայացմանը:
«Պետական բյուջեի պակասուրդի ֆինանսավորումը 2020-ին նախատեսվում է իրականացնել առանց բյուջետային աջակցության վարկերի ներգրավման, ինչը վերջին տասնամյակներում նորություն է մեր բյուջեի համար: Եվ բոլոր մասհանումները կիրականցվեն այս պահի դրությամբ գործող կառավարության արտաքին վարկերի գծով, հաստատված բյուջեում այս մասով նոր վարկային համաձայնագրի ստորագրում դրված չէ»,-ասաց Մարությանը:
Ընդհանուր առմամբ նախատեսվում է կատարել շուրջ 360 մլն դոլարի մասհանումներ, արտաքին վարկերի գծով կկատարվի 233 մլն դոլարի մարում: Մասհանումների կառուցվածքում ամենախոշոր ոլորտը ճանապարհաշինությունն է՝ շուրջ 117 մլն դոլարի մասհանումներով, հաջորդը՝ էներգետիկ համակարգն է՝ 58 մլն դոլար մասհանումներով, ոռոգման համակարգը՝ 51 մլն դոլարի չափով մասհանումներով և կրթության ու սոցիալական ոլորտը՝ 43 մլն դոլարի մասհանումներ:
Ամենախոշոր վարկային ծրագիրը, որով նախատեսվում են մասհանումներ, Ատոմային էլեկտրակայանի 2-րդ էներգաբլոկի վերակառուցման ծրագիրն է, որի գծով մասհանումները նախատեսված են 31 մլն դոլարի չափով:
«Իսկ եթե դիտարկենք մասհանումների կառուցվածքն ըստ վարկատուների, ապա կտեսնենք, որ ամենամեծ մասնաբաժին ունենք Ասիական զարգացման բանկի վարկերի գծով՝ շուրջ 27 տոկոս, հաջորդը Համաշխարհային բանկն ՝ մոտ 20 տոկոսի չափով: Երրորդ տեղում Ռուսաստանի Դաշնության երկու վարկերն են՝ 58 մլն դոլարի մասհանումների չափով դրանք ընդհանուր ծավալի 16 տոկոսն են»,-ասաց Մարությանը: