Google և Facebook ընկերությունների բիզնես-մոդելները սպառնում են մարդու իրավունքներին, հայտարարել է Amnesty International միջազգային իրավապաշտպան կազմակերպությունը:
Ըստ Amnesty International-ի զեկույցի՝ Google-ը և Facebook-ը օգնել են միավորել աշխարհը և կարևորագույն ծառայություններ են մատուցում միլիարդավոր օգտվողների, բայց բախվում են համակարգային ծախսերի:
«Ընկերությունների բիզնես-մոդելը, որը հիմնված է օգտատերերի գործողությունների դիտարկման վրա, մարդկանց ստիպում է «ֆաուստյան գործարք» կնքել, որի համաձայն նրանք կարող են մարդու իրավունքներից օգտվել առցանց, ենթարկվելով միայն մարդու իրավունքների խախտումների վրա հիմնված համակարգին»,- ասվում է զեկույցում:
Նախ՝ խոսքը անձնական տարածքի իրավունքի նկատմամբ «աննախադեպ ոտնձգության» մասին է, գտնում են Amnesty-ում:
Հաջորդը անուղղակի ազդեցությունների շարքն է, որոնք լուրջ ռիսկի են ենթարկում մի շարք այլ իրավունքներ՝ խոսքի ազատությունից մինչև մտքի ազատություն և ազատությունը խտրականությունից, ասվում է զեկույցում:
«Google-ի և Facebook-ի կողմից գաղտնիության աստիճանական ոչնչացումը անմիջական արդյունք է այն բանի, որ ընկերությունները շուկայում գերիշխող դիրքի են հասել և վերահսկողություն են հաստատել համաշխարհային հանրային տարածքի վրա»,- նշել է կազմակերպությունը:
Ընկերությունները, օգտատերերի տվյալները հավաքելուց հետո, դրանք օգտագործում են մարդկանց վերլուծելու, նրանց խմբերի բաժանելու և նրանց հետաքրքրությունների, բնութագրի և վարքի վերաբերյալ կանխատեսումներ անելու համար:
«Այս երկու ընկերությունները լայն տեղեկատվություն են հավաքում այն մասին, թե ինչ ենք մենք փնտրում, ուր ենք գնում, ում հետ ենք շփվում, ինչ ենք ասում, ինչ ենք կարդում»,- ասվում է տեքստում:
Գաղտնիության խախտումը, «որը գտնվում է Google-ի և Facebook-ի հենց սրտում», ցույց է տալիս այս ընկերությունների շուրջ սկանդալների երկար պատմությունը, և չնայած գաղտնիության քաղաքականությանը հավատարիմ մնալու իրենց հավաստիացումներին, դժվար է չնկատել այն բազմաթիվ խախտումները, որոնք իրենց բիզնես-գործունեության մաս են դարձել, գրում է Amnesty-ն: