Ռուս երգիչ Սերգեյ Լազարևը, որը երկիրը ներկայացրել է «Եվրատեսիլ 2019» մրցույթում, հայտարարել է, որ կցանկանար տեսնել Վրաստանի տված միավորները:
Ինչպես հայտնում է Gazeta.ru-ն, երգչի խոսքով՝ ռուսական կողմի նկատմամբ կողմնակալ վերաբերմունք է ցուցաբերվել: Լազարևը չի հասկանում, թե ինչու որոշ երկրների ժյուրիի անդամները չեն ցանկացել դիտարկել Ռուսաստանի համարը: Նրան հատկապես զարմացրել է Վրաստանի քայլը:
Երգիչը, սակայն, շնորհակալություն է հայտնել հանդիսատեսին ջերմ աջակցության և տված ձայների համար:
«Շատ եմ ցանկանում տեսնել, թե ինչպես է հանդիսատեսը քվեարկել այն երկրներում, որտեղ մեզ 0 միավոր են տվել»,- շեշտել է Լազարևը:
Սերգեյ Լազարևը երգի միջազգային մրցույթում զբաղեցրել է 3-րդ տեղը՝ ստանալով 369 միավոր: Թել Ավիվում անցկացված մրցույթում հաղթող է ճանաչվել Նիդեռլանդների ներկայացուցիչը:
