168.am-ը գրում է.
Քաղտեխնոլոգ Արմեն Բադալյանի խոսքով՝ ՀՀ վարչապետ Նիկոլ Փաշինյանը հասկանում է, որ իր հեղինակությունն ընկնում է, որի պատճառները մտածմունքի տեղիք են տալիս։
«Ենթադրում եմ, որ վարչապետը մտածում է, թե ինչու է իր հեղինակությունն ընկնում, քանի որ հեղափոխություն է արել, Կառավարությունում ձախողումներ չի ունեցել, դրա մասին նա իր ասուլիսին ասաց, Ազգային ժողովում հեռախոսից կարդում էր այն բոլոր հաջողությունների մասին, որոնք ունեցել է։ Այսքանից հետո հարց է առաջանում, թե ինչու է նրա վարկանիշն ընկնում, որի առնչությամբ վարչապետը մտածում է, որ երևի նախկին իշխանության ներկայացուցիչները միլիոներ են ծախսում, ֆեյքեր են պահում, որոնք մանիպուլյացնելով ժողովրդին՝ իր վարկանիշը նվազեցնում են։ Բնականաբար, վարչապետի մոտ ստեղծվում է հետևյալ պատկերը, որ ինքը ճիշտ է, շրջապատը՝ սխալ, որի դեմ պետք է պայքարել»,- լրագրողների հետ հանդիպմանը նշեց քաղտեխնոլոգը։
Ըստ Արմեն Բադալյանի՝ վարչապետն ամենուր թշնամիներ է փնտրում, մի տեղ ԲՀԿ-ն է, մի այլ տեղում՝ Նորագավիթի մաքսատան աշխատող երիտասարդը, մի այլ տեղում՝ ՀՀԿ-ն, որն անձնագիր է տվել տրանսգենդերին, որն այս դեպքում տվել էր ոստիկանությունը, և այլն։
«Վարչապետի մոտ առաջացել է անսխալականության սինդրոմ, նա անգամ իր ելույթներից մեկում նշել է, որ այսօրվա խորհրդարանն այն խորհրդարանը չէ, որը սպասում էր։ Այսինքն՝ վարչապետի մոտ առաջացել է մեկ գաղափար, որ ինքը ճիշտ է, մյուսները՝ սխալ, ինքն ամեն ինչ ճիշտ է անում, բայց մյուսները չեն կարողանում իրեն հասկանալ, և նրանք մեղավոր են, որ իրեն չեն հասկանում»,- շեշտեց քաղտեխնոլոգը։
