1995-1999թթ. համայնքների սեփականություն հանդիսացող ջրամատակարման ու ջրահեռացման համակարգերը կառավարության ուղղորդմամբ հանձնվեցին «Հայջրմուղկոյուղի» ընկերությանը` անհատույց կառավարման: Հանձնողների թվում էր նաև Կապան համայնքը: Բացառություններ էլ եղան, օրինակ` Քաջարան քաղաքը: Հիմա Քաջարանում ջրաչափ չկա, սակագինն էլ ըստ շնչի որոշում է ավագանին: Գույքն էլ տնօրինում է քաղաքը, հետևաբար շահույթն էլ գալիս է քաղաքային բյուջե: Կապանում դարձել ենք «Հայջրմուղկոյուղի» ընկերության գերին: Անցած տարիներին Կապանում, բացի փող հավաքելը, գրեթե ներդրում չի եղել: Չնայած, ամսվա կտրվածքով հավաքվում է շուրջ 30 միլիոն դրամ, և միայն 7 է մնում որպես պահպանման ծախս: Բնականաբար, այսպիսի յուղոտ պատառը էլի տնօրինելու ցանկություն կա: Եվ Կապանի ավագանին օրերս որոշել է ևս 25 տարով պայմանագիրը երկարացնել: Կապանի նախաձեռնող խումբը դեմ է այս որոշմանը և Քաջարանի օրինակով ցանկանում է կառույցը հետ բերել համայնքի ենթակայության ներքո: Այդ նպատակով քաղաքապետի ու ավագանու հետ կազմակերպվեց հանդիպում, իսկ այսօրվանից նաև ստորագրահավաք: Զուգահեռ պարզվեց, որ ընկերությունը գույքի մի մասի համար արդեն ձեռք է բերել սեփականության իրավունք: Ի դեպ, Կապանի քաղաքապետ Աշոտ Հայրապետյանը իմ հարցմանը ի պատասխան ասում էր, որ «Հայջրմուղկոյուղու» Կապան տեղամասի ողջ գույքը ամբողջությամբ պատկանում է Կապանին, հիմա արդեն կա սեփականության վկայական, որից պարզ երևում է, որ այս պնդումը, գոնե իրավական առումով, սխալ է: Պարզվեց, որ համակարգի ջրահավաք գլխամասերը և վարչական շենքը սեփականության վկայական են ստացել 2010 թվականի հոկտեմբերին, 2004 թվականի կառավարության որոշման հիման վրա /1485Ա 07.10.2004/, սակայն ոչ կառավարության կայքում` https://www.e-gov.am/gov-decrees/calendar/2004/10/, ոչ էլ http://www.arlis.am/ կայքում այդ որոշումը չկա, այդ որոշումը չկա նաև պաշտոնական տեղեկագրում...
1.Կարծում եմ` Կապանի քաղաքապետը պետք է դիմի դատարան` քաղաքի սեփականություն հանդիսացող գույքը քաղաքապետարանի հաշվեկշիռ վերադարձնելու և կեղծ փաստաթղերի հիմքեր ստեղծողներին պատժելու պահանջով...
2.Մինչև գույքային հստակության պահը դադարեցնել գույքագող «Հայջրմուղկոյուղի» ընկերության հետ որևէ հետագա համագործակցության բանակցություն....
Հ.Գ. Ստորագրահավաքը շարունակվում է, պայքարը ևս...
