«Գրիգորյանը նախօրեին հրաժարական տվեց, սակայն լրատվամիջոցները դեռ նրա դեմ ուղղված նամակներ են ստանում: Դրանցից մեկը, օրինակ, վերնագրված է. «Ի լուր Հանրային ռադիոյի վերջին իրադարձությունները միակողմանի լուսաբանողների», որտեղ շարունակում են ներկայացնել արդեն նախկին տնօրենի «չարագործությունները», մասնավորապես, որ նա «ֆիզիկական բռնություն» է գործադրել տարեց աշխատակիցների նկատմամբ:
Ռադիոյի աշխատակազմի այն հատվածը, որը չի մասնակցել բունտին, զարմացած է Մարկ Գրիգորյանի հեշտ նահանջից: Նրանք կարծում են, որ այս պաշտոնանկությունն իրականացվել է Հանրային հեռուստառադիոխորհրդի նախագահ Ռուբեն Ջաղինյանի կողմից, իսկ ապստամբներն ընդամենը հրահանգ են կատարել: Չեղարկված ասուլիսն էլ չի կայացել հենց Ջաղինյանի մասնակցությամբ:
Նախօրեին Մամուլի ազգային ակումբ ասուլիսի շտապող Մարկ Գրիգորյանին, ասում են, վերջին պահին զանգահարել է Ջաղինյանը և հրահանգել ասուլիս չտալ: Սակայն ռադիոյում արդեն տնօրենի թեկնածուի անուններ են շրջանառվում: Ամենից շատ հիշատակվում է ՀԺԿ նախկին անդամ Ստեփան Զաքարյանի անունը:
Զաքարյանը խորհրդի անդամ է, նրա պայմանագրի ժամկետը շուտով ավարտվում է, և Ջաղինյանը փորձում է նրան տեղավորել Ռադիոյի տնօրենի պաշտոնում: Թեև միանգամայն պարզ է, որ առանց Նիկոլ Փաշինյանի համաձայնության ու գիտության դա հնարավոր չէ»,-գրում է թերթը:
Նյութն ամբողջությամբ կարդացեք թերթի այսօրվա համարում:
