Tert.am-ը գրում է.
Հանրային ծառայությունները կարգավորող հանձնաժողովի նախագահի պաշտոնակատար Միքայել Սողոմոնյանը սուտ և հերյուրանք է որակում «Ժամանակ» թերթի տեղեկությունը, թե այս պահին կառավարությունում է գտնվում գազի և էլեկտրաէներգիայի սակագնի ձևավորման մի հաշվարկ, ըստ որի՝ գազը բնակչությանը կարելի է վաճառել խորանարդ մետրը 100 դրամով, ինչպես նաև էականորեն կարելի է նվազեցնել էլեկտրաէներգիայի սակագինը, սակայն Միքայել Սողոմոնյանը և ՀԾԿՀ նախկին աշխատակից, իսկ այժմ էներգետիկայի և բնական ռեսուրսների նախարար Գարեգին Բաղրամյանն անում են ամեն ինչ, որ այդ հաշվարկը չհասնի վարչապետ Նիկոլ Փաշինյանին։
«Եթե ուշադիր կարդաք, գրված է, որ էդ մտացածին հաշվարկը կառավարությունում է և մենք թույլ չենք տալիս, որ հասնի կառավարություն»,- ԱԺ-ում լրագրողների հետ զրույցում նշեց Հանրային ծառայությունները կարգավորող հանձնաժողովի նախագահի պաշտոնակատարը՝ անդրադառնալով Tert.am-ի հարցին՝ արդյոք նախարարի հետ միասին խոչընդտում են, որպեսզի սակագների իջեցման մասին հաշվարկը հասնի վարչապետին։
Լրագրողները Միքայել Սողոմոնյանին հիշեցրեցին, որ հրապարակման մեջ գրված է եղել, որ անմիջապես վարչապետի սեղանին հասնելու մասին է խոսքը, ոչ թե կառավարության, քանի որ այլ համաձայնություններով, նաև նախարարի դրդմամբ, այն կարող է լինել կառավարությունում, բայց չհայտնվել Նիկոլ Փաշինյանի սեղանին։
«Մենք ո՞նց կարող ենք միջամտել, որ վարչապետին չհասնի, եթե կառավարությունում է հաշվարկը, էնեգետիկայի նախարարն ի՞նչ պետք է անի, ես ավելին չեմ ուզում խոսել, դա հերյուրանք է, մոլորություն են մտցնում սպառողների մեջ»,-վստահեցրեց նա։
Ամբողջական հոդվածը կարող եք կարդալ այստեղ