Վենետիկի տեղական իշխանությունները հայտարարել են, որ քաղաքի առնվազն 70%-ն այս պահին ծածկված է հեղեղաջրերով։ Արդյունքում քաղաքում ջրի մակարդակը բարձրացել է՝ հասնելով ծովի մակարդակից 149 սանտիմետր բարձրության։
Վենետիկում հեղեղները շատ սովորական երևույթ են, սակայն այս երկուշաբթի օրը տեղի ուենցածը կարելի է բացառիկ դեպք համարել։ Ընդ որում՝ եղանակային կանխատեսումների համաձայն՝ ջրի մակարդակը մոտ օրերս կարող է հասնել մինչև 160 սանտիմետրի։
Այս պահին գրանցված ցուցանիշն ամենաբարձրն է վերջին 6 տարում՝ սկսած 2012 թվականից։ Իսկ վերջին անգամ Վենետիկում ջրի մակարդակը հասել է մինչև 160 սանտիմետրի 39 տարի առաջ՝ 1979 թվականին։
Ջրի մակարդակի բարձրացումը պայմանավորված է հորդառատ անձրևային տեղումների հետ։ Ոմանք կարծում են, որ եթե անձրևներն այս տեմպերով շարունակվեն, ապա հնարավոր է՝ կրկնվի 1966 թվականի աղետը, երբ անձրևաջրերով հեղեղվել էին ողջ Վենետիկն ու Ֆլորենցիան։
