«Թղթակիցներ առանց սահմանի» (Reporters without borders) միջազգային կազմակերպությունն իր կայքում հրապարակել է աշխարհի տարբեր երկրներում, այդ թվում՝ Հայաստանում ԶԼՄ-ների ազատության վերաբերյալ տվյալներ։
Ըստ կազմակերպության տվյալների՝ 2018-ին, անցյալ տարվա հետ համեմատած, Հայաստանի դիրքն իջել է մեկ նիշով, եւ այժմ հանրապետությունը մամուլի ազատության սանդղակով 80-րդ տեղն է զբաղեցնում։
Ինչպես նշվում է կայքում, Հայաստանում տպագիր մամուլը բազմազան է եւ բեւեռացված, հետաքննչական լրագրողությունը զարգանում է Ինտերնետ-ԶԼՄ-ների ոլորտում, սակայն հեռարձակող ԶԼՄ-ների շրջանում բազմակարծությունը դեռեւս հետ է մնում։
«Օրենսդրական նախաձեռնությունները սահմանափակում են լրատվության հասանելիությունը եւ, իջեցնելով հասարակական ինստիտուտների թափանցիկությունը, դառնում են անհանգստության աղբյուր»,- հայտնում է կազմակերպության հաղորդագրությունը։
Ըստ կայքի՝ Հայաստանում լրագրողների հանդեպ ֆիզիկական բռնությունները հիմնականում անպատիժ են մնում։
Կազմակերպության կայքը տեղեկացնում է նաեւ հարեւան երկրների ցուցանիշների մասին։ Վրաստանը ԶԼՄ-ների ազատության սանդղակում 61-րդ տողն է զբաղեցնում, իսկ Ադրբեջանը՝ 163-րդ։
Նույն տեղեկատվության համաձայն, այս տարի ԶԼՄ-ների ազատության մակարդակով առաջին տեղում Նորվեգիան է։
