Armtimes.com-ը գրում է.
Այս հոկտեմբերին սպասվում են ե՛ւ նորմայից բարձր ջերմ ու տաք օրեր, ե՛ւ համեմատաբար սառը, ինչն արդեն տվյալ ամսվա համար կլինի բնականոն:
«Ամբողջ ամսվա համար՝ միջին կտրվածքով, կանխատեսվող ջերմաստիճանը նորմայի սահմաններում է, տեղումների քանակը՝ նորմայից ավելի: Այսինքն՝ եթե ամիսը բաժանենք երեք տասնօրյակների եւ միջինացնենք, ապա ամսական միջին ջերմաստիճանը կլինի նորմայի սահմաններում: Բայց տասնօրյակների բաժանելու դեպքում մի քիչ ավելի զանազան պատկեր է ստացվում: Առաջին տասը օրում ջերմաստիճանը նորմայից բարձր կլինի 2-3 աստիճանով, որովհետեւ դեռեւս շարունակում ենք գտնվել արեւադարձային տաք օդային հոսանքների ազդեցության գոտում: Ներկա պահին՝ հոկտեմբերի 1-ին, կլիմայական նորմայից 5-6 աստիճան շեղում ունեք, ջերմաստիճանը բարձր է, առավելագույն ջերմաստիճանը հասել է 31 աստիճանի, որը, կարելի է ասել, մոտ է պատմական առավելագույնների շեմին»,- «Հայկական ժամանակի» հետ զրույցում ասաց ՀՀ ԱԻՆ հիդրոմետ ծառայության օդերեւութաբանության կենտրոնի պետ Գագիկ Սուրենյանը:
Արդեն ամսի 5-ից, ըստ նրա, մեր երկիր կներթափանցեն սառը օդային հոսանքներ եւ ամսի 5-6-ն ընկած ժամանակահատվածում ջերմաստիճանը, այդ թվում Երեւանում, կնվազի 5-6 աստիճանով: Քանի որ սառը օդը գալու է հանրապետության հյուսիս-արեւելքից, դրա անմիջական ազդեցության գոտում կլինեն Լոռին, Տավուշը, Սյունիքը եւ Արցախը: Այնտեղ հոկտեմբերի 5-6-ն ընկած ժամանակահատվածում, ըստ կանխատեսումների, ջերմաստիճանի անկումը կլինի 8-10 աստիճանով:
Ինչ վերաբերում է տեղումներին, այս գիշեր եւ վաղը՝ հոկտեմբերի 2-ին, առանձին շրջաններում, այդ թվում Երեւանում, սպասվում են թույլ տեղումներ: 3-ին տեղումների գոտին կպահպանվի միայն հյուսիսային մարզերում՝ Շիրակ, Լոռի, Տավուշ, Արագածոտն, Գեղարքունիք, Կոտայք: Մնացած տարածքներում կլինի առանց տեղումների եղանակ: Հոկտեմբերի 4-ին ընդհանրապես տեղումներ չեն կանխատեսվում, իսկ արդեն 5-6-ին հյուսիս-արեւելքից ներթափանցող մթնոլորտային ճակատը տեղումներ կբերի Լոռի, Տավուշ, Սյունիք, Արցախ հատվածներում: Մյուս գոտիներում տեղումներ չեն կանխատեսվում:
«Եթե ջերմաստիճանը նվազի, կմոտենա կլիմայական նորմային, բայց հիմնական անձրեւները եւ հիմնական ցիլկոնային գործունեությունը, որը սովորաբար բնորոշ է հոկտեմբերին, կսկսվի երկրորդ տասնօրյակից: Այսինքն՝ առաջին տասնօրյակը կլինի միջինացված տաք, իսկ արդեն երկրորդ եւ երրորդ տասնօրյակները կլինեն համեմատաբար սառը եւ կմոտենան կլիմայական նորմային»,- եզրափակեց Գագիկ Սուրենյանը:
