Google ընկերության անվտանգության հետազոտող Յան Բիրը (Ian Beer) առաջարկել է Apple-ին իր հետ 2,45 միլիոն դոլարի գործարք կնքել: Այս գումարով նա գնահատել է iOS համակարգում իր կողմից հայտնաբերված խոցելիությունները: Ընկերության ղեկավար Թիմ Քուքին ուղղված դիմումը նա հրապարակել է իր Twitter-ում:
Գրառումը հայտնվել է Բիրի միկրոբլոգում՝ Լաս-Վեգասում տեղի ունեցած անվտանգության Black Hat գիտաժողովից հետո: Ցանցահենը որոշել է Apple-ից վճար պահանջել բոլոր սխալների համար, որոնց մասին նա հայտնել է վերջին տարիների ընթացքում: Ստացված գումարը նա ցանկացել է նվիրաբերել Amnesty International իրավապաշտպան կազմակերպությանը:
«Ողջույն, Թիմ Քուք: Ես տարիներ շարունակ աշխատել եմ, որպեսզի օգնեմ iOS-ն ավելի անվտանգ դարձնել: Ահա ներկայացնում եմ բոլոր այն սխալների ցանկը, որոնց համար պարգևատրում եմ պահանջում: Չէի՞ք կարող ինձ հրավիրել ձեր ծրագիր, որպեսզի մենք կարողանայինք այդ գումարը նվիրաբերել Amnesty International-ին»,- դիմել է Բիրը Apple-ի ղեկավարին:
Apple-ի ներկայացուցիչները Բիրի հետ դեռևս կապի մեջ չեն մտել: Նա ստիպված է եղել մեկ անգամ ևս հիշեցնել իր մասին:
Hi @tim_cook, Ive been working for years to help make iOS more secure. Heres a list of all the bugs I reported which qualified for your bug bounty since its launch, could you invite me to the program so we can donate this money to @amnesty? pic.twitter.com/VUKj7BaJ4P
— Ian Beer (@i41nbeer) August 8, 2018
