Դոնալդ Թրամփը և Կիմ Չեն Ինը Սինգապուրի պատմական սամմիթի արդյունքներով ստորագրեցին հռչակագիր, որի տեքստը ցույց տվեցին լրագրողներին: Հռչակագիրը 4 հիմնական կետ ունի: ԱՄՆ-ը և ԿԺԴՀ-ն պարտավորվել են հարաբերություններ հաստատել երկու երկրների միջև` երկու պետությունների ժողովուրդների խաղաղության ու բարգավաճման հասնելու ցանկության համապատասխան:
ԱՄՆ-ն ու ԿԺԴՀ-ն համատեղ ջանքեր կգործադրեն, որ Կորեական թերակղզում կայուն ու տևական խաղաղություն հաստատվի: ԿԺԴՀ-ն հաստատում է հավատարմությունը 2018-ի ապրիլի 27-ին ստորագրված Պհանմունջոնի հռչակագրին և Կորեական թերակղզին ամբողջությամբ միջուկային զենքից ազատելուն: ԱՄՆ-ը և ԿԺԴՀ-ն պարտավորվում են վերադարձնել զինծառայողների ու անհայտ կորածների աճյունները` ներառյալ արդեն նույնականացված աճյունները: ԱՄՆ-ն ի պատասխան միջուկային ծրագրից հրաժարվելու Կիմ Չեն Ինի անձնական անվտանգության երաշխիքներ է խոստանում: Նախագահ Թրամփը խոստացել է ԿԺԴՀ-ի անվտանգության երաշխիքներ տալ, իսկ նախագահ Կիմ Չեն Ինը հաստատել է Կորեական թերակղզու ապամիջուկայնացման վճռական ու աներեր որոշումը:
Փաստաթղթում չկան կոնկրետ մանրամասներ` ինչպես է Հյուսիսային Կորեան ազատվելու միջուկային զենքից: Հայտարարության մեջ հիշատակված չեն ԿԺԴՀ-ի նկատմամբ սահմանված պատժամիջոցները: Չկան նաև Հս. ու Հվ. Կորեաների միջև խաղաղության համաձայնագրի խոստումներ: 1950-53-ի կորեական պատերազմի մասնակից երկրները, որի ժամանակ զոհվել են միլիոնավոր մարդիկ, պաշտոնապես մինչև հիմա հրադադարի վիճակում են:
Թրամփը սամմիթից հետո հայտարարեց, որ հանդիպումը ծայրահեղ կարևոր էր և բավականաչափ հագեցած: Նա պատրաստվում է Կիմին հրավիրել Սպիտակ տուն: Կիմ Չեն Ինը համատեղ հռչակագրի ստորագրման ժամանակ հայտարարեց, որ Թրամփի հետ հանդիպումը պատմական էր և ուզում է անցյալը անցյալում թողնել: Կիմը շնորհակալություն հայտնեց Թրամփին, որ հանդիպումը կայացավ:
Չինաստանի ԱԳՆ-ն հանդիպման արդյունքներով հայտարարություն տարածեց` հանդիպումն անվանելով նոր պատմություն ստեղծող իրադարձություն: Չինաստանի ԱԳՆ ներկայացուցիչը հայտարարեց, որ համաձայնության ստորագրումից հետո կարող է քննարկվել Հյուսիսային Կորեայի նկատմամբ պատժամիջոցների թուլացման հարցը:
Կիմին հանդիպելուց հետո ԱՄՆ նախագահը մամլո ասուլիս տվեց և պատասխանեց լրագրողների հարցերին: Թրամփի խոսքով` ինքը ժամանակ չի ունեցել խորանալու մանրամասների մեջ ու կազմելու առավել հանգամանալից հռչակագիր: Հենց այդ պատճառով հռչակագրում չկան մանրամասներ՝ ինչպես է միջուկազերծվելու ԿԺԴՀ-ն: ԱՄՆ նախագահը հաստատեց, որ պետքարտուղար Մայք Պոմպեոն և անվտանգության հարցերով խորհրդական Ջոն Բոլտոնը կշարունակեն աշխատել ստորագրված համաձայնագրի կոնկրետացման վրա և այդ ժամանակ պարզ կդառնա` որքանով է Կիմ Չեն Ինը հակված խոստումների կատարմանը: Թրամփը հույս ունի, որ Կորեական թերակղզին նույնքան արագ կմիջուկազերծվի, որքան հնարավոր է «գիտականորեն ու տեխնիկապես»: Նա որևէ ժամկետ չնշեց և չվստահեցրեց, որ համաձայնագիրն անպայման կկատարվի, սակայն ասաց, որ, իբրև գործարքներ կնքելու մեծ փորձ ունեցող մարդ, զգաց, որ Կիմ Չեն Ինն իրոք ցանկանում է ԱՄՆ-ի հետ համաձայնագիր կնքել: Թրամփն ասաց, որ ԱՄՆ-ը պատրաստվում է հրաժարվել «ռազմական խաղերից», այսինքն` համատեղ մասշտաբային զորավարժություններից Հվ. Կորեայի հետ, բայց չի կրճատի զինվորականների թիվը տարածաշրջանում: Պատասխանելով Հյուսիսային Կորեայի բանտերում գտնվող քաղբանտարկյալների վերաբերյալ հարցին` Թրամփը նրանց անվանեց բանակցությունների հաղթողներից մեկը և հավելեց, որ առայժմ խոսք չկա ԿԺԴՀ-ի պատժամիջոցների հանման մասին, դա կարվի, երբ Հս.Կորեան կներկայացնի միջուկազերծման ապացույցներ: Նա նաև ասաց, որ Ինին խորհուրդ է տվել զարգացնել զբոսաշրջային բիզնեսը:
Հունիսի 12-ի Սինգապուրի հանդիպումը, իհարկե, պատմական է: Թեկուզ այնքանով, որ կայացավ․ ոչ ոք դուռը չշրխկացրեց ու մյուսին դավաճանության մեջ չմեղադրեց: Թրամփն ու Կիմն անհավանական հաջողության մասին են խոսում, և դա այնքան էլ մեծ չափազանցություն չէ: Իրոք կարող է հաջողությունն անհավանական դառնալ:
Հարցը մեկն է` իսկ կկատարվե՞ն համաձայնությունները: Նախկինում էլ եղել են հայտարարություններ` մենք ուզում ենք միջուկազերծ թերակղզի, մենք ուզում ենք տնտեսական կապերն ամրապնդել, մենք ուզում ենք խաղաղ ու բարգավաճող Ասիա: Սատանան մանրամասների մեջ է, որոնց մեջ խորանալու ժամանակ Դոնալդ Թրամփը չի ունեցել: Դիվանագիտության պատմության մեջ եղել են և երկու Կորեաների նախագահների հանդիպումներ, և ԱՄՆ պետքարտուղարի ու Հս. Կորեայի ներկայացուցիչների հանդիպումներ ու պայմանավորվածություններ: Ամեն ինչ սկսել է փլուզվել, երբ պայմանավորվածությունները փորձել են կյանքի կոչել: Չի բացառվում, որ հետագայում ԱՄՆ-ը մեղադրի ԿԺԴՀ-ին խոստումները չկատարելու մեջ, իսկ Փխենյանը հայտարարի, որ չստացավ իրեն խոստացվածը: ԱՄՆ-ը Հս. Կորեայի հետ արդեն ունեցել է մեծ համաձայնագիր, նույնիսկ որոշակի առաջընթաց, իսկ հետո իրավիճակն ավելի է վատացել: Կարող է և ամեն ինչ ստացվել: Կիմ Չեն Ինն Արևմուտքի նկատմամբ նորմալ վերաբերմունք ունի և կարող է նախորդներից այլ վարքագիծ դրսևորել: Հս. Կորեայի նկատմամբ ԱՄՆ պատժամիջոցները նախկինների համեմատ շատ ավելի կոշտ են և այդ պատժամիջոցներից օր առաջ ազատվելը Փխենյանի գերխնդիրն է: Չինաստանն ու Ռուսաստանը մեծ վախ ունեն, որ Թրամփը, ինչպես ՄԱԿ-ի ամբիոնից էր հայտարարել, կարող է պատերազմ սկսել Հյուսիսային Կորեայի հետ և համակողմանի ճնշում էին գործադրում, որ կողմերը ինչ-որ համաձայնության հանգեն: ՌԴ ԱԳ նախարարը մեկնեց Փխենյան ու իր խոսքով՝ շատ հաջող հանդիպում ունեցավ Կիմ Չեն Ինի հետ ու նրան Մոսկվա հրավիրեց:
