Հին Չինաստանում երիտասարդ ընտանիքը պետք է ապրեր ամուսնու տանը, իսկ հարսը ծառայում էր և՛ ամուսնուն, և՛ նրա մորը: Այնպես էր պատահել, որ մի աղջիկ ամուսնությունից հետո ի վիճակի չէր տանել իր սկեսրոջ մշտական կշտամբանքները: Նա որոշել էր ազատվել սկեսրոջից: Աղջիկը գնաց դեղաբույսեր վաճառողի մոտ, ով իր հոր ընկերն էր, և ասաց.

— Ես այլևս չեմ կարողանում ապրել իմ սկեսրոջ հետ: Նա ինձ խելքահան է անում: Ուզում եմ, որ օգնեք ինձ: Ես լավ կվճարեմ:

— Ի՞նչ կարող եմ անել քեզ համար, - հարցրեց դեղաբույսեր վաճառողը:

— Ես ուզում եմ, որ Դուք ինձ մի թույն վաճառեք: Ես կթունավորեմ իմ սկեսրոջը և կազատվեմ նրանից, - պատասխանեց նա:

Երկար մտածելուց հետո դեղաբույսեր վաճառողն ասաց.

— Լավ, ես կօգնեմ քեզ, սակայն դու պետք է երկու բան հասկանաս: Առաջինը՝ դու չես կարող միանգամից թունավորել սկեսրոջդ, որովհետև այդ ժամանակ մարդիկ գլխի կընկնեն, թե ինչ է պատահել: Ես քեզ բույսեր կտամ, որոնք հետզհետե կսպանեն նրան, և ոչ ոք չի կասկածի, որ նրան թունավորել են...

Երկրորդը՝ որպեսզի վերջնականորեն կասկածները հանենք մեր վրայից, դու պետք է զսպես ցասումդ, սովորես հարգել նրան, սիրել, լսել և համբերատար լինել: Այ այդ ժամանակ, երբ նա մահանա, ոչ ոք չի կասկածի, որ դա դու ես արել:

Աղջիկը համաձայնեց բոլոր պայմաններին, վերցրեց բույսերը և սկսեց այն ավելացնել սկեսրոջ կերակուրին: Բացի դրանից նա սովորեց վերահսկել իրեն, լսել սկեսրոջը և հարգել նրան: Երբ սկեսուրը տեսավ, որ հարսի հարաբերությունը իր նկատմամբ փոխվել է, սկսեց ամբողջ սրտով սիրել նրան: Նա բոլորին պատմում էր, որ իր հարսը ամենալավն է, այնպիսին է, որ կարելի է միայն երազել: Մի կես տարուց նրանց հարաբերությունները այնքան մտերիմ և լավը դարձան, որ կարծես մայր և աղջիկ լինեին:

Եվ ահա, մի գեղեցիկ օր, աղջիկը եկավ դեղաբույսեր վաճառողի մոտ և խնդրեց.

— Աստծո սիրուն, խնդրում եմ Ձեզ, օգնեք սկեսրոջս, որ ձերբազատվի իմ տված թույնից: Ես չեմ ուզում սպանել նրան: Նա աշխարհի ամենալավ սկեսուրն է, և ես շատ եմ նրան սիրում:

Դեղաբույսեր վաճառողը ժպտաց և պատասխանեց.

— Մի անհանգստացիր, ես քեզ ոչ մի թույն էլ չեմ տվել: Այն, ինչ ես քեզ տվել եմ, ուղղակի համեմունքներ են: Իսկ թույնը գտնվում էր միայն քո գլխի մեջ, և դու ինքդ էլ դրանից ազատվեցիր:


Մայքլ Պարկես «Անուբիս» 1999

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել