«Երբ մրցավարը դադարեցրեց մենամարտը, ես անակնկալի եկա: Չէի սպասում նման արդյունքի, ես տրամադրված էի հաղթանակի: Ես միայն աչքի վնասվածք ստացա եւ տեխնիկական նոկաուտով պարտվեցի: Մենամարտի դադարի պահից մտածեցի ռեւանշ պահանջելու մասին»: Այս մասին ասել է սուպերմիջին քաշային կարգում WBO վարկածով աշխարհի նախկին չեմպիոն Արթուր Աբրահամը, ով մարտի 22-ին տեխնիկական նոկաուտով պարտվեց Ռոբերտ Շտիգլիցին։
Արթուր, ինչպե՞ս է տրամադրությունդ:
Լավ, շնորհակալություն: Ցավում եմ, որ այս մենամարտում չարդարացրի իմ մարտարվեստի երկրպագուների սպասելիքները, կաշխատեմ շտկել այս բացթողումս:
Ինչպե՞ս է առողջական վիճակդ:
Լավ եմ, առողջական որեւէ խնդիր չունեմ:
Ի՞նչ էր պատահել աչքիդ:
Աչքիս որեւէ լուրջ բան չի պատահել, տեսողական խնդիր չունեմ, պարզապես ակնախոռոչն ուռել էր եւ փակել ակնաբիբը:
Մենամարտից հետո եղա՞վ հիվանդանոց գնալու անհրաժեշտություն։
Գնացի հիվանդանոց, լրացուցիչ ստուգում անցա:
Արթուր, ռեւանշ-մենամարտը Շտիգլիցի հետ ինչպե՞ս կմեկնաբանես:
Լավ պատրաստվել էի այս մենամարտին: Բայց բռնցքամարտում անկանխատեսելի երեւույթներ հաճախ են պատահում: Շտիգլիցի հարվածից նրա ձեռնոցի բութ մատը մտավ աչքս, դրանից ուռեց ակնախոռոչս, եւ բժիշկը դադարեցրեց մարտը: Աչքը կարեւոր օրգան է, աչքի վնասվելու դեպքում վտանգավոր է մենամարտը շարունակելը:
Համարո՞ւմ ես, որ այս մենամարտում դու պարտվեցիր:
Այս մենամարտում ես աչքի վնասվածք ստացա, մրցավարները դադարեցրին մարտը, հայտարարվեց տեխնիկական նոկաուտ, եւ հաղթանակը շնորհվեց Ռոբերտ Շտիգլիցին:
Եթե բժիշկները զննեին եւ չդադարեցնեին մենամարտը, դու կարո՞ղ էիր հաղթանակով ավարտել այս մենամարտը, թե՞ արդեն վնասվածքդ ուժասպառ էր արել քեզ:
Ուժասպառ չէի եղել, ես տրամադրված էի հաղթելու: Առաջին երկու ռաունդներում դու միայն պաշտպանվում էիր, պատասխան հարվածներ չէիր հասցնում:
Դա քո տակտիկա՞ն էր, թե Շտիգլիցը հարվածելու հնարավորություն չէր տալիս իր արագաշարժությամբ:
Դա իմ մարտավարությունն է, ես նախ մի քանի ռաունդ պաշտպանվում եմ, ապա սկսում եմ ուժգին հարվածել:
Երբ մրցավարը կանգնեցրեց մենամարտը, դու անակնկալի եկար: Ի՞նչը քեզ անակնկալի բերեց:
Չէի սպասում նման արդյունքի, մրցավարի որոշումն ինձ անակնկալի բերեց:
Արթուր, երբ մրցավարը հայտարարեց, որ մենամարտի հաղթողը Ռոբերտն է, ի՞նչ զգացիր այդ պահին: Ի՞նչ կատարվեց քեզ հետ այդ պահին:
Անմիջապես որոշեցի ռեւանշ պահանջել:
Իսկ աչքդ վնասելու համար Շտիգլիցը քեզանից ներողություն կամ ինչ-որ բան ասե՞լ է մենամարտից հետո:
Ոչ:
Ե՞րբ ես նախատեսում անցկացնել երրորդ մենամարտը Շտիգլիցի հետ:
Դեռ հայտնի չէ, դրա վերաբերյալ պետք է մեր թիմերը համաձայնության գան:
Քո անձնական մարզիչը Sportbox.ru-ին տված մեկնաբանությունում ասել էր, որ նա նախապես տեղյակ է եղել Շտիգլիցի տակտիկային եւ տեխնիկային: Ի՞նչ կասես այդ մասին:
Ես եւ մարզիչս մենամարտերից առաջ դիտում ենք մրցակիցների նախորդ մենամարտերի տեսագրությունները եւ ըստ դրա մարտավարություն մշակում:
Վստա՞հ ես, որ երրորդ ռեւանշ մենամարտի դեպքում աշխարհի չեմպիոնի գոտին կվերադառնա քեզ:
Ես ամեն անգամ ռինգ եմ գնում` հաղթելու նպատակով: Այժմ իմ եւ Շտիգլիցի հաշիվը 1:1 է: Մեր երրորդ մենամարտը կլինի որոշիչ:
Քեզ հաջողություն եմ մաղթում առաջիկա մենամարտում:
Շնորհակալություն:
Աղբյուրը՝ sport.news.am
