 |
| Քաղաքական մեկնաբան |
Նախօրեին կայացած մամուլի ասուլիսում ՀՀ նախագահը, անդրադառնալով ինտեգրացիոն գործընթացներին, նշել է. «Մի հավատացեք բոլոր այն մարդկանց, ովքեր ասում են, որ ռուսները մեզ պարտադրում են դառնալ Մաքսային միության անդամ: Չկա այդպիսի բան: Մենք հակառակը կարող ենք ասել՝ Մաքսային միության անդամները դեռևս ցանկություն չունեն որևէ մեկին ներգրավելու, գոնե մեր մասով ես չեմ տեսել այդպիսի ցանկություն: Կամ-կամի խնդիր չենք լուծում: Ուզում ենք, որպեսզի մեր երկիրը զարգանա և այդ պրոցեսում օգտագործի և՛ Մաքսային միության, և՛ Եվրասիական միության, և՛ Եվրամիության կողմից ցուցաբերվող աջակցությունը: Մենք մեկին չենք խոստանում, որ վաղը վազելով գալու ենք ու հետո գնում, մյուսին ասում՝ ոչ ձեզ մոտ ենք գալիս»:
Վերջին ամիսներին, ինչ-որ առումով, նաև արհեստական ձևով, փորձ էր կատարվում սրել ինտեգրացիոն ճակատում ընթացող իրադարձությունները՝ և՛ ներսից, և՛ դրսից: Դրանց նպաստում էին, ինչպես եվրոպացի տարբեր պաշտոնյաների հայտարարությունները, այնպես էլ ռուսական կողմից հնչող կարծիքները: Դեռ 2012 թվականի վերջին ՀՀ նախագահը ռուսական հեռուստաընկերություններցից մեկին տված հարցազրույցում, անդրադառնալով վերոնշյալ թեմային, ասել էր, որ բացի մեծ թվով տեխնիկական խնդիրներից` կա նաև մեկ այլ շատ կարևոր խնդիր` Մաքսային միության պոտենցիալ անդամների հետ սահմանի բացակայությունը, ինչը լուրջ խոչընդոտ է:
Դրանից բացի, նախագահը շեշտեց, որ համապատասխան քննարկումները գնում են երկու կողմերի միջև ստեղծված մասնագիտական հանձնաժողովների միջև (քննարկումների նշաձողը բավականին իջեցվեց):
Նախագահի այս հայտարարությունը հստակություն մտցրեց հիմնական գործընկերների հետ հարաբերություններում՝ մի կողմից ՌԴ-ի, ով նաև ռազմավարական դաշնակից է, մյուս կողմից ԵՄ-ի, ում հետ և՛ քաղաքական, և՛ տնտեսական համագործակցությունը մանավանդ վերջին տարիներին բավականին թափ է հավաքել:
Երկրորդ, նախագահը ոչ միայն ցույց տվեց, որ գործընկերների հետ հարաբերություններում կողմ է ազնիվ ու բաց համագործակցության, այլև հստակ ուղերձ հղեց միջազգային հանրությանն առ այն, որ ցանկացած երկրի հետ փոխհարաբերություններում Հայաստանը, հաշվի առնելով այլոց հետաքրքրությունները, այնուամենայնիվ, առաջնորդվում է միմիայն սեփական շահերով:
Երրորդ. Այս թեմայով նախագահի վստահ հայտարարությունը նաև ցույց է տալիս, որ Հայաստանի դիրքորոշումը ինտեգրացիոն հարցերում ընկալելի է և ընդունելի է միջազգային հանրության կողմից:
