Այսօր Արմավիրի մարզում քարոզարշավ է իրականացնում ՀՀԿ-ն: Հանդիպումը բնակչության հետ անցնում է փակ դահլիճային ձևաչափով, բնակիչների հարցերին պատասխանում է ՀՀ վարչապետ Կարեն Կարապետյանը:
Բնակիչներից մեկը հարց ուղղեց նրան` արդա՞ր է, որ 40 տարվա ստաժ ունեցող տղամարդը ստանում է 40 հազար դրամ, խուսափում է հոսանք կամ գազ օգտագործելուց, քանի որ չի կարողանում վճարել կոմունալ վարձերը և ապրել այդ թոշակով:
Կարեն Կարապետյանը նշեց, որ թոշակների բարձրացում կլինի միայն այն բանից հետո, երբ աշխատունակ բնակչությունն ինտենսիվ աշխատի, երբ աշխատատեղեր բացվեն, տնտեսությունը զարգանա, հավելյալ արժեք ստեղծվի, և արդյունքում` փողը բավականացնի թոշակ ու աշխատավարձ բարձրացնելու համար:
«Մենք ունենք սահմանափակ կարողություններ, ուստի ամեն ամիս, ամեն օր ինտենսիվ աշխատանքով, ներդրումներով, խաղի կանոնները պարզեցնելով, վարչական միջամտությունը նվազեցնելով, արհեստական մոնոպոլիաները վերացնելով, բիզնեսմեններին ու գործարարներին չխանգարելով, փորձում ենք դրանք ընդլայնել: Հիմա եթե ձեզ ասեմ` վաղը լավ ենք ապրելու` առանց տնտեսության փոփոխության, գուցե ձեր ականջը կշոյվի, բայց դա ճիշտ և ազնիվ պատասխան չի լինի»,- ասաց Կարեն Կարապետյանը:
