Հատված «Օրվա խորհուրդը» գրքից/
Ընթերցվածք` Ես. 8.5-10
«Գիտցե´ք, հեթանոսնե´ր, Աստված մեզ հետ է, պիտի պարտվեք. լուրը հասցրեք աշխարհի չորս կողմե´րը. դուք, որ հզորացել եք, պիտի պարտվեք: Թեև դուք դարձյալ ուժեղանալու եք, բայց էլի պարտության եք մատնվելու: Ինչ խորհուրդ էլ անեք` Տերը խափանելու է այն, և ինչ էլ ասելու լինեք` չի հաստատվելու, քանզի Տեր Աստված մեզ հետ է» (8.9-10):
Երանի Եսայու մարգարեությանն ունկնդիր բոլոր այն քրիստոնյաներին, ովքեր ճշմարտապես ապրում են «Տեր Աստված մեզ հետ է» հավատով և գիտակցությամբ: Մեր ժողովուրդը ևս մշտապես արարել ու մաքառել է «զի Աստուած ընդ մեզ է» վստահությամբ ու զորությամբ...
Ընթերցվածքի այս հատվածը, եթե զորություն է հավատավոր հոգու համար, ապա ահ ու սարսափ է այն անձանց համար, ովքեր համարձակվում են հեթանոսական բարքեր ու երևույթներ սերմանել և խրախուսել: Ցավոք, այսօր մեզանում ճշմարիտ աստվածճանաչողության 17-դարյա շրջանից հետո իսկ կան այդպիսիք... Մեր կյանքում պետք է առաջնորդվենք աստվածապավինությամբ, որովհետև ամեն երևույթ հաղթահարելի է, եթե Աստված մեզ հետ է, երբ Նա բնակվում է մեր հոգիներում, երբ վկայվում է մեր գործերով ու կյանքով: Այնժամ որևէ մեղք, որքան էլ որ քաղցրահամ, որևէ չարիք և թշնամի, որքան էլ որ զորավոր և ազդեցիկ, չի կարող դիմադրել Լույսին, չի կարող ստվերել մեր կյանքի Արեգակը, չի կարող հաղթել Հարուցյալ մեր Տիրոջը, Ով մահվամբ մահը հաղթեց և մեզ կյանք պարգևեց:
