Sputnik լրատվական գործակալության փոխանցմամբ՝ Վրաստանի պաշտպանության նախարար Թինա Խիդաշելին և հաշտեցման ու քաղաքացիական իրավահավասարության հարցերով պետնախարար Պաատա Զաքարեիշվիլին այսօր պաշտոնապես լքել են զբաղեցրած պաշտոնները:
Վրաստանի վարչապետ Գեորգի Կվիրիկաշվիլին նախորդ շաբաթ բավարարել էր հրաժարականի մասին նրանց դիմումները: Դեռ հայտնի չէ, թե տվյալ պաշտոններում ովքեր կնշանակվեն:
Մինչ այդ տվյալ գերատեսչությունները ժամանակավորապես կղեկավարեն նրանց առաջին տեղակալները՝ պաշտպանության փոխնախարար Դավիթ Էբրալիձեն և հաշտեցման ու քաղաքացիական իրավահավասարության հարցերով պետնախարարի տեղակալ Կտևան Ցիխելաշվիլին:
Վրաստանի խորհրդարանական մեծամասնության պատգամավոր Էկա Բեսելիան լրագրողների հետ զրույցում հայտարարել է, որ իրենք վստահում են վարչապետի որոշմանը և վստահ են, որ որոշումը կլինի խելամիտ:
Խիդաշելիի և Զաքարեիշվիլիի հրաժարականն անհրաժեշտ է եղել «Վրացական երազանք» դաշինքի փլուզումից հետո և կապված է հոկտեմբերի 8-ին Վրաստանում կայանալիք խորհրդարանական ընտրությունների հետ:
Խիդաշելին ու Զաքարեիշվիլին ներկայացրել են «Հանրապետական» կուսակցությունը, որը որոշել է առանձին մասնակցել խորհրդարանական ընտրություններին: