«Ոսկե ծիրանի» բացման օրվանից բոլորը սպասում էին այս տարվա հատուկ հյուրին՝ կինոաստղ Ժակլին Բիսեթին։ Կինոփառատոնի 4-րդ օրը ֆրանսիացի դերասանուհին ժամանեց Հայաստան և ներկա գտնվեց Մոսկվա կինոթատրոնում իր մասնակցությամբ ֆիլմերի հետահայաց ցուցադրությանը։ BlogNews-ը ներկայացնում է միջոցառման հետաքրքիր պահերը։
«Ոսկե Ծիրան»-ի հիմնադիր նախագահ Հարություն Խաչատյանը նշեց, որ Ժակլին Բիսեթին հրավիրել են, որպեսզի նրան հանձնեն փառատոնի ամենամեծ՝ Սերգեյ Փարաջանովի անվան մրցանակը` «Փարաջանովյան թալերը»։ Նա Բիսեթին անվանեց համաշխարհային կինոյի ամենագեղեցիկ դերասանուհիներից մեկը:
Դերասանուհին էլ նկատեց, որ Հայաստանոում շատ լավ է զգում իրեն։ «Ես ապրում եմ Լոս Անջելեսում, որտեղ հայերը շատ են: Նրանց հետ շատ եմ զրուցել Հայաստանի մասին, բայց մտքովս չէր անցնում, որ մի օր կլինեմ այստեղ: Որոշել եմ այս ընթացքում ինձ համար բացահայտել ձեր երկիրը: Արդեն համոզվել եմ, որ հայերը շատ ջերմ են, խոհանոցն էլ կուսումնասիրեմ:)»,- ասաց նա։
Բիսեթի մասնակցությամբ ֆիլմերի հետահայաց ցուցադրությունը սկսվեց ֆրանսիական կինոյի դասական Ֆրանսուա Տրյուֆոյի «Ամերիկյան գիշեր» ֆիլմով։ Բիսեթը նկատեց, որ «Ամերիկյան գիշերը» պարունակում է կինեմատոգրաֆի բոլոր տարրերը` կատակերգությունից մինչև ողբերգություն։ «Վստահ եմ, որ դահլիճից հեռանալու եք մեծ տպավորությամբ: Բարի դիտում բոլորիդ»,- եզրափակեց կինոաստղը։
Նյութը՝ Ամալյա Հովհաննիսյանի
Լուսանկարները` Նարեկ Բաղիրյանի
