Բոլորին է հայտնի, որ Հայաստանում կան մի շարք ոլորտներ, որոնք պարունակում են բարձր կոռուպցիոն ռիսկեր: Սա խնդիր է, որը ոչ միայն հանրային ուշադրության կենտրոնում պետք է լինի, այլ նաև պետությունը պետք է մեխանիզմներ ներդնի, որոնք ոչ միայն կնպաստեն ոլորտի թափանցիկության բարձրացմանը, այլ նաև կոռուպցիոն ռիսկերի կրճատմանը: Վերջին շրջանում պետությունը գնաց որոշակի կրճատումների, հայտարարվեց մի քանի ոլորտներում հակակոռուպցիոն մեխանիզմների ներդրման մասին: Ճիշտ է օպտիմալացմանն ուղված գործիքների արդյունքները մեկ օրում տեսանելի չեն լինի, սակայն բարձր ռիսկայնություն պարունակող գնումների ոլորտում ներդրված մեխանիզմները զսպաշապիկ են լինելու կոռուպցիոն գործարքների համար:
Ֆինանսների նախարարության կողմից մշակվել է գնումների հաշվետվողականության համապատասխան մոդուլ, որը հասանելի է հանրությանը (www.armeps.am/ppcm) և շահագործվում է պետական կառավարման մարմինների կողմից սույն թվականի հուլիսի 1-ից, իսկ քաղաքացիները հնարավորություն կունենան այս տարվա սեպտեմբերի 1-ից: Ի՞նչ է այն իրենից ներկայացնում: Գնումների գործընթացի տարբեր փուլերում հնարավորություն է ընձեռվում յուրաքանչյուր հետաքրքրվող անձի, էլեկտրոնային գնումների կայքէջում տեսնել գնումների գործընթացների արդյունքում կնքված բոլոր պայմանագրերը, կնքված պայմանագրերի կատարման արդյունքները, ինչպես նաև մշակել ծրագրային լուծում, որը հնարավություն կընձեռի յուրաքանչյուրին էլեկտրոնային գնումների կայքէջում, ընտրելով հետաքրքրող պարամետրերը, ինքնուրույն ձևավորել հաշվետություններ:
Ենթադրելի է, որ այս ամենի արդյունքում բարձրանալու է պետական գնումների ոլորտի թափանցիկության մակարդակը: Նախկինում բավականին չարաշումներ են եղել: Այս կերպ հանրային հսկողություն է սահմանվում պետական ապարատներում տեղի ունեցող առք ու վաճառքի վրա:
Պետությունը դանդաղ քայլերով, բայց կարող է մոտենալ մի քանի ոլորտներում կոռուպցիոն ռիսկերի մաքսիմալ նվազեցմանը: Ինչպես տեսնում ենք, արդեն դրանցից շատերը շոշափելի են: Հույս ունենանք, որ նման մեխանիզմներ կներդրվեն նաև բարձր կոռուպցիոն ռիսկայնություն պարունակող այլ ոլորտներում:
