Մի օրվա հաճույքի համար վնաս չտանք մեր պետությանը

Նաև Հրաչ Բերբերյանը խիստ կասկածում է, որ հայկական արոտավայրերից օգտվող անասունները հետագայում ևս սահմանի վրա պարտադիր կստուգվեն:

Նշենք, որ ըստ «Էկոլուրի» հրապարակման, դեռևս անցյալ տարվա հուլիսի 10-ին Սյունիքի մարզպետ Սուրեն Խաչատրյանի ղեկավարությամբ Իրանի Արևելյան Ադրբեջան (Արևելյան Ատրպատական) նահանգի հետ ստորագրվել է գյուղատնտեսության ոլորտում համագործակցության հուշագիր, որով նախատեսվում է ոչխարաբուծության նպատակներով Սյունիքի արոտավայրերը վարձակալությամբ տալ Իրանի վերոնշյալ նահանգին՝ առնվազն 50 հազ. հա չափով՝ մինչև 10 տարի ժամկետով:

Եվս 2000 հա կտրամադրվի որպես բնակավայր: Այստեղ արածելու են առնվազն 50 հազ. եղջերավորներ:

Հրաչ Բերբերյանը տեղեկացված է, որ վարձակալական ծրագիրը հիմնականում վերաբերում է ոչխարաբուծությանը, ինչը նշանակում է, որ հետագայում դա հանգեցնելու է հողերի էրոզիայի: Եվ, ըստ գյուղատնտեսի, հարց է ՝ մենք հետագայում կվերականգնե՞նք այդ հողերը, թե՝ ոչ:

Tert.am-ի հետ զրույցում Սյունիքի մարզի գլխավոր անասնաբույժ Կամո Սարգսյանը վստահեցրեց, որ անասունների հիվանդությունների վերահսկողությունը պատշաճ ձևով իրականացվելու է: Նրա խոսքով՝ այդ կենդանիները մինչ սահմանն անցնելը կստուգվեն , նոր ներս կթողնվեն, բայց անկախ նրանից, թե իրանցիներն ինչ փաստաթղթեր կներկայացնեն, մեկ է՝ հայկական կողմը պետք է ստուգի։

Նրա տեղեկացմամբ՝ Սյունիքում այս պահին 70 անասնաբույժ կա ՝ չհաշված համաճարակաբանները:
«Ծրագիրն ունի իր դրական և բացասական կողմերը։ Բացասական է այն, որ վարակների և հիվանդությունների ռիսկը կմեծանա: Իսկ դրականն այն է, որ աշխատատեղեր կավելանան, կաթի վերամշակման կետեր են բացվելու, մեր մարզի կաթնամթերքի իրացումն ավելի կհեշտանա, քանի որ իրենք կապահովեն իրացումը: Ես մի անգամ ներկա եմ եղել այդ հավաքին, և նրանք խոստացել են, որ այդ ամենը կլինի, նաև խոստացել են, որ գյուղատնտեսական տեխնիկայով և գործիքներով կաջակցեն մեզ»,- ասաց սյունեցի անասնաբույժը:

Ի պատասխան հարցի, թե Սյունիքի բնակիչներին արոտավայրեր պետք չե՞ն, Կամո Սարգսյանը նշեց, որ միայն Սիսիանի տարածքում 12 հազ հա արոտավայր չի օգտագործվում: «Քանի որ նրանք, ովքեր մեկ-երկու գլուխ անասուն են պահում, չեն կարողանում տանել այդ տարածքներում արածացնել: Մենակ Գորիսի տարածաշրջանում է, որ անասունները տանում են Ջերմուկի սարը։ Ոնց որ պայմանագրեր կան, որ իրենք պիտի այդ հարցերով օգնեն»,- ասաց նա:

Հիշեցնենք, որ մի շարք բնապահպաններ ևս իրենց մտահոգությունն էին հայտնել այս ծրագրի հնարավոր գործարկման առնչությամբ ։ Բնապահպանները նաև համոզմունք էին հայտնել, որ Հայաստան գալուց հետո «քոչվորները հիմնավորապես կհիմնավորվեն Հայաստանում»: Անգամ շրջանառվեց ոչխարների միջոցով թմրանյութ տեղափոխելու տարբերակը:

Նշենք, որ Վաղը Ազգային ժողովի «Հայ Յեղափոխական Դաշնակցություն» խմբակցության քարտուղար Աղվան Վարդանյանը ԱԺ-Կառավարություն հարցուպատասխանի ժամանակ կառավարությունից փորձելու է պատասխան ստանալ «Ի՞նչ է նշանակում պետության մի մասը վարձակալության տալ Իրանին» հարցին, որն այսօր հնչեցրեց ԱԺ հայտարարությունների ժամին՝ հայտարարության տեսքով:

Պատգամավորն իր զարմանքը հայտնեց, թե ինչպես կարող է տեղական ինքնակառավարման մարմինը կիսաթաքուն ձևով այսպիսի ինքնագլուխ որոշում կայացնի, որը բնապահպանական, քաղաքական և բազմաթիվ այլ հետևանքներ կարող է ունենալ:

«Գումարին չեմ անդրադառնում, որքան էլ այն արժեք ներկայացնի, խնդիրը ռազմական նշանակություն ունի: Ի՞նչ է նշանակում, ի վերջո, պետության տարածքի մի մասը վարձակալության տալ: Որքանո՞վ է հիմնավոր նման չակերտավոր որոշումը»,- ասաց նա:

Ի պատասխան հարցի, թե համոզվա՞ծ է, որ որոշումը Կառավարության մակարդակով չէ, Աղվան Վարդանյանը Tert.am-ի հետ զրույցում վստահեցրեց, որ որոշումը մարզային մակարդակով է:

Նշենք նաև, որ բառացիորեն այսօր երեկոյան նշված խնդրի շուրջ պարզաբանմամբ է հանդես եկել ՀՀ տարածքային կառավարման նախարարությունը, որում, մասնավորապես, նշվում է.

«ՀՀ Սյունիքի մարզի և ԻԻՀ Արևելյան Ատրպատական նահանգի միջև իրավական հետևանք առաջացնող որևէ համաձայնագիր կնքված չէ: «Էկոլուր» ՀԿ-ի կողմից հրապարակված փաստաթղթերը, ըստ էության, երկու պատվիրակությունների հանդիպման արդյունքների արձանագրությունն են, որոնք անվանվել են «Համաձայնագիր»: Փաստաթղթերում ընդամենն արձանագրվել են կողմերի միջև տեղի ունեցած բանակցությունների արդյունքներն ու քննարկված հարցերի վերաբերյալ մոտեցումներն ու առաջարկությունները: «Համաձայնագիր» կոչվող փաստաթղթերն ստորագրել են երկու պատվիրակությունների գյուղատնտեսության հարցերով պատասխանատուները, և դրանցում արտացոլված հարցերը պետք է վերջնական լուծում ստանան ներպետական մակարդակով, իսկ անհրաժեշտության դեպքում՝ անցնեն օրենսդրությամբ սահմանված ընթացակարգեր:

Հայտնում ենք նաև, որ անկախ փաստաթղթերի իրավական կարգավիճակից, հողերի վարձակալության հանձնելու կարգը սահմանված է ՀՀ հողային օրենսգրքով: Քանի դեռ ՀՀ հողային օրենսգրքի պահանջների համաձայն պայմանագրեր չեն կնքվել և իրենց գրանցումը չեն ստացել համապատասխան պետական մարմնում, նշված փաստաթղթերի շրջանակում Սյունիքի մարզում արոտավայրերի վարձակալման մասին խոսելը տեղին չէ:

Տեղեկացնենք նաև, որ մինչ այժմ ինչպես տարածքային կառավարման, այնպես էլ տեղական ինքնակառավարման մարմինները մշտապես պատրաստակամորեն քննարկել և համապատասխան ընթացք են տվել ՀՀ քաղաքացիների կողմից (իրավաբանական կամ ֆիզիկական անձինք) ազատ հողերի, այդ թվում՝ արոտավայրերի վարձակալության համար ներկայացված դիմումները: Հիշեցնենք, որ ՀՀ կառավարության 2010թ. N 1477-Ն և 2011թ. N 389-Ն որոշումներով դյուրացվել է արոտավայրերի վարձակալության գործընթացը: Արոտավայրերի վարձակալության պահանջարկի դեպքում բոլոր օղակներում համապատասխան մարմինները միշտ պատրաստակամ են դրանք ուսումնասիրել և անհրաժեշտ ընթացք տալ»: