Pastinfo.am-ը գրում է.
Հունիսի 3-ին «Արմենիա» բժշկական կենտրոնում ծնված և մեկ օր անց մահացած արական սեռի երեխան ծնվել է բազմաթիվ խնդիրներով:
Այդ մասին «Փաստինֆո»-ի թղթակցի հետ զրույցում ասաց Երևանի Պերինատոլոգիայի, մանկաբարձության և գինեկոլոգիայի կենտրոնի ղեկավար Ռազմիկ Աբրահամյանը՝ հավելելով, որ երեխան բնածին ներարգանդային ինֆեկցիա է ունեցել, ծնվել է երկկողմանի թոքաբորբով, եղել են նաև այլ խնդիրներ:
Վաղարշապատ քաղաքի 32-ամյա բնակչուհին վաղաժամ ծննդաբերություն է ունեցել, բժիշկները չեն սպասել, որպեսզի լրանա 9 ամիսը և նրան 1,5 ամիս շուտ ուղեգրել են «Արմենիա» բժշկական կենտրոն:
«Կնոջ մոտ վաղաժամ ծննդաբերություն է եղել, ճարպակալում, երեխան ծնվել է ճիչով, մայրը լսել է նորածին որդու ճիչը, երեխային տվել են նրան, սակայն հիվանդություններ կան, որոնք ի հայտ են գալիս երեխայի ծնվելուց հետո»,- ասաց Ռազմիկ Աբրահամյանը:
Ավելի վաղ տեղեկացրել էինք, որ ըստ ծննդկանի՝ բժիշկներն իրեն հավատացրել են, որ իր նորածին երեխայի հետ ամեն ինչ նորմալ է, սակայն հաջորդ օրը փոքրիկը մահացել է։ Մայրը բժշկուհուն է մեղադրում նորածին որդու մահվան մեջ։
