Araratnews.am-ը գրում է.
ՆԱՏՕ-ի նախկին գլխավոր քարտուղար, այժմ Ուկրաինայի նախագահի խորհրդական Անդերս Ֆոգ Ռասմուսենը կարծում է, որ Ղրիմը վերադարձնելը չպետք է լինի Ուկրաինայի անհետաձգելի առաջնահերթությունը, հաղորդում է Ռիա Նովոստին:
«Երկարաժամկետ հեռանկարում դա բոլոր արևմտյան պետությունների նպատակն է: Ինչպես երբեք նախկինում չենք ճանաչել ԽՍՀՄ-ին երեք բալթյան պետությունների` Էստոնիայի, Լատվիայի և Լիտվայի անօրինական միացումը, այնպես էլ երբեք չենք ճանաչելու Ղրիմի անօրինական միացումը Ռուսաստանին»,-ասել է Ռասմուսենը:
Միաժամանակ նա շեշտել է, որ խորհուրդ չի տալիս Ուկրաինայի նախագահ Պյոտր Պորոշենկոյին Ղրիմի վերադարձը դարձնել անհետաձգելի առաջնահերթություն:
«Այդ հարցը կա, որը կշարունակի գոյություն ունենալ, սակայն այս պահին պետք է կենտրոնանալ այլ խնդիրների վրա: Դրանք են բարեփոխումները, Մինսկ-2-ի համաձայնությունների լիակատար իրականացումը և այլն»,- հայտարարել է ՆԱՏՕ-ի նախկին գլխավոր քարտուղարը:
