Նմանատիպ նամակներ կեղծելը շատ հեշտ է. Ս. Մարտիրոսյանը՝ «Զվարթնոց»-ում ինքնաթիռի պայթեցման մասին լուրի վերաբերյալ

Tert.am-ը գրում է.

Այսօր էլեկտրոնային միջոցներով ահաբեկչությունը բավականին լուրջ սպառնալիք է դարձել ամբողջ աշխարհում: Այս մասին Tert.am-ի հետ զրույցում ասաց Տեղեկատվական տեխնոլոգիաների անվտանգության փորձագետ Սամվել Մարտիրոսյանն՝ անդրադառնալով նրան, որ «Զվարթնոցում» ինքնաթիռի պայթեցման մասին լուրն ուղարկողն էլեկտրոնային հասցեն ստեղծել է ադրբեջանական օպերատորի IP հասցեից:

Սամվել Մարտիրոսյանը օրինակ բերեց, որ ոչ վաղ անցյալում Ղազախստանի բանկային համակարգը «փլվեց» նրա պատճառով, որ անանուն հաղորդագրություններ էր մարդկանց ուղարկվում մեսինջերներով՝ ստիպելով գնալ իրենց ավանդները հանել բանկերից:

«Դա խնդիր է, որ սպառնում է բոլորին, որովհետև այս ոլորտում շատ հեշտ կարելի է կեղծել»,-ասաց նա և նշեց, որ անհրաժեշտ էր, որպեսզի լրատվամիջոցների հրապարակած  տեղեկատվությունը լիներ ստուգված:

«Նմանատիպ նամակները չպետք է դիտարկել որպես ճշմարիտ աղբյուր»,-ասաց Սամվել Մարտիրոսյանը և նկատեց, որ երբեմն անհայտ, գոյություն չունեցող կազմակերպությունների անունից հաղորդագրություններ են տարածվում:

«Այստեղ երկու խնդիր իրար են բախվել. առաջին այն է, որ նմանատիպ նամակներ կեղծելը շատ հեշտ է, այնքան հեշտ է, որ նույնիսկ դպրոցականը կարող է անել, երկրորդն այն է, որ չկան հստակ գործողությունների քայլեր՝ նմանատիպ իրավիճակների համար»,-ասաց նա և նշեց, որ այստեղ ակնհայտ երևաց, որ խառնաշփոթ է ստեղծվել բոլոր մակարդակներում:

Փորձագետն ասաց, որ մի կողմից տեխնոլոգիաները հեշտացրել են նմանատիպ գործողությունները , իսկ մյուս կողմից պարզ դարձավ, որ  մեր տեղեկատվական դաշտը պատրաստ չէ նմանատիպ մարտահրավերների: