Tert.am-ը գրում է.
Քիչ առաջ Ազգային ժողովում ուշացումով մեկնարկեցին 4+4+4 ձևաչափով Ընտրական օրենսգրքի նախագծի վերաբերյալ քննարկումները, որին մասնակցում են իշխանությունից չորս հոգի, ընդդիմությունից չորս հոգի և քաղաքացիական հասարակությունից չորս հոգի: Չէր ներկայացել միայն «Ժառանգություն»-ի Զարուհի Փոստանջյանը:
Ուշացման պատճառը քաղաքացիական հասարակության ներկայացուցիչների չներկայանալն էր, ովքեր ԱԺ անցակետում անձնագրերը թողնելու հետ կապված խնդիր էին տեսնում:
Նրանց ուշացումը արժանացրեց քննարկման մյուս անդամների դժգոհությունը. ԱԺ աշխատակազմի ղեկավար Հրայր Թովմասյանը հեռախոսով զրուցեց նրանց հետ, ներկայացրեց կարգը: Այնուհետև «Հայ ազգային կոնգրես» խմբակցության ղեկավար Լևոն Զուրաբյանը իջավ անցակետ՝ հասկանալու համար խնդիրը: Նրանք պարզաբանեցին, որ իրենք իրավունք ունեն նույնականացման քարտը չթողնել անցակետում, և կարող են միայն ներկայացնել:
ՀՀ արդարադատության նախարար Արփինե Հովհաննիսյանը լրագրողների հետ զրույցում ասաց, որ քննարկումը շատ կարևոր հարցի շուրջ է, քան այս պահին ԱԺ մուտք ու ելքի կարգը, ինչը միշտ էլ գործել է:
Քաղաքացիական հասարակության ներկայացուցիչներն ի վերջո ներկայացան քննարկմանը. նրանց ներկայացուցիչներից Տիգրան Եգորյանը, Արտակ Զեյնալյանը լրագրողներին ասացին, որ իրենք միշտ մուտք են գործել Ազգային ժողով՝ միայն ներկայացնելով անձնագիրը և ոչ թե այն թողնելով անցակետում: Նրանք նշեցին, որ ներկայումս նույնականացման քարտը թողել են անցակետում:
