Tert.am-ը գրում է.
FlyDubai ավիաընկերության գործադիր տնօրեն Գեյթ ալ-Գեյթը, անդրադառնալով Դոնի Ռոստովում այսօր գիշերը օդանավի կործանմանը, հայտարարել է, որ Դոնի Ռոստովի օդանավակայանում եղանակը թույլ է տվել չվերթ իրականացնել: Այդ մասին հաղորդում է РИА Новости-ն:

«Եթե եղանակը անհարմար լիներ, ինքնաթիռը չէր թռչի»,- հայտարարել է ալ-Գեյթը՝ ավելացնելով, որ դեռ շուտ է ասել, թե ինչն է եղել ինքնաթիռի կործանման պատճառը։

«Մենք տեղեկություն կունենանք միջադեպի հանգամանքների և սև արկղի մասին: Ռուսաստանի իշխանությունների հետ համագործակցությամբ իրականացվում է հետաքննություն, և մենք սպասում ենք արդյունքներին»,- ասել է Գեյթը և հավելել, որ օդաչուից տագնապի ազդանշան չի ստացվել:

Բացի այդ, այժմ ստուգվում է տեղեկությունն այն մասին, որ կործանված Boeing-ը փորձել է երկու ժամ վայրէջք կատարել: Նրա խոսքերով՝ դա ոչ ստանդարտ իրավիճակ է:

Ավելի վաղ հայտնի է դարձել, որ Դոնի Ռոստովի օդանավակայանում վայրէջք կատարելու անհաջող փորձից հետո Boeing 737-800 ինքնաթիռը օդում է եղել ևս դեռ երկու ժամ:
 
Հիշեցնենք, որ Ռուսաստանի Դոնի Ռոստով քաղաքի օդանավակայանում այսօր՝ տեղի ժամանակով 03։50-ին, վթարի է ենթարկվել FlyDubai ավիաընկերությանը պատկանող Boeing 737-800 ուղևորատար ինքնաթիռը, ինչի հետևանքով զոհվել են բոլոր 55 ուղևորները և անձնակազմի 6 անդամները: Վթարը տեղի է ունեցել վայրէջքի ժամանակ, երբ ինքնաթիռը չի կարողացել վայրէջք կատարել թռիչքուղու վրա և ընկել է դրանից 50-100 մետր հեռավորության վրա, ինչի հետևանքով ինքնաթիռը մի քանի մասի է բաժանվել և հրդեհվել: Ռուսաստանի Դաշնության Քննչական կոմիտեն նշել է Դոնի Ռոստովում ավիաաղետի հիմնական վարկածները` օդաչուի սխալ կամ տեխնիկական անսարքություն։
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել