Tert.am-ը գրում է.
Ադրբեջանում ազատ է արձակվել լրագրող Ռաուֆ Միրկադիրովը: Ադրբեջանցի լրագրողն ասել է, որ նրա դեմ մեղադրանքներն անհիմն են, հաղորդում է BBC-ի ռուսական ծառայությունը:
«Իմ ձերբակալությունն Ադրբեջանի թշնամիների ձեռքի գործն է»,- հայտարարել է լրագրողն ազատ արձակվելուց հետո իր առաջին հարցազրույցում:
Անցած տարվա վերջին դատարանը դատապարտել է Միրկադիրովին վեց տարվա ազատազրկման՝ պետական դավաճանության համար: Լրագրողը մեղավոր է ճանաչվել «Հայաստանի օգտին լրտեսության համար»։
Վերաքննիչ դատարանը պատիժը փոխարինել է պայմանականի՝ հինգ տարվա փորձաշրջանով:
Միրկադիրովը պնդում է, որ երբեք գործ չի ունեցել Հայաստանի կամ աշխարհի որևէ այլ երկրի հատուկ ծառայությունների հետ:
Լրագրողը պատրաստվում է հասնել դատավճռի ամբողջական չեղարկման:
Միրկադիրովը ձերբակալվել էր 2014 թվականի ապրիլին՝ պետական դավաճանության փորձի համար՝ Թուրքիայից արտաքսվելուց անմիջապես հետո։ Միրկադիրովի ձերբակալության իրական պատճառը, սակայն, իրավապաշտպան Լեյլա Յունուսի «Խաղաղության և ժողովրդավարության» նախագծերին մասնակցելն է։
