Երևանի կենտրոնական հատվածում հին շենքերի քանդումը տարբեր կերպ բացատրող և արդարացնող մարդիկ չգիտեն մի պարզ ճշմարտություն որն արտահայտել է Ժան Բոդրիյարը. «Հին իրերի գեղեցկությունը նրանում է, որ դրանք հասել են մինչև մեր օրեր»:

Եվ իրոք, երբ պեղումների ժամանակ մի փոքր իր են գտնում, որն այլևս ոչ մեկին պետք չէ և դրանից մի քանի հատ էլ արդեն գտել են, միևնույն է, այդ գտածոն ոչ թե շպրտում են, այլ խնամքով տանում թանգարան, նաև սերունդներին ցուցադրելու համար:
Եթե մի փոքր առարկան նման ուշադրության է արժանանում, և դա նորմալ մարդկային քաղաքակիրթ վերաբերմունք է անցյալի նկատմամբ, ապա այս ամենն առավել ևս ճիշտ է մի ամբողջ շենքի համար:

Բոլորիս տներում կան հին, այլևս չօգտագործվող իրեր, որոնք մեզ են հասել ծնողների ծնողներից, բայց մենք պահում ենք դրանք զուտ որովհետև այդ իրերը հասել են մեզ, և մենք բարոյական իրավունք չունենք կտրելու ժամանակի մեջ նրանց ճամփորդությունը:

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել