Ինչպես դառնալ հետախուզության վարչության գործակալ. 10 միջոց

Բոնդի ֆիլմերը դիտելով՝ շատերը սկսում են տարվել հետախույզների ու լրտեսների վտանգավոր ու միաժամանակ հետաքրքիր կյանքով։ Իսկ ինչպե՞ս դառնալ հետախույզ. ահա մի քանի միջոց։

Եթե իսկապես ցանկանում ես տարբերվել հետախուզական վարչության թիմում հայտնվել ցանկացող մյուս դիմորդներից, ապա ռազմավարական նշանակության կարևոր բարդ լեզուներ սովորիր։ Օրինակ՝ ԱՄՆ ԿՀՎ-ում պահանջված են արաբերեն, չինարեն կամ կորեերեն լեզուների իմացությամբ գործակալներ։ Այս լեզուները սովորելու համար տարիներ չեն պահանջվի, սակայն բավականաչափ խոչընդոտներ կլինեն։ Ամեն դեպքում, եթե քեզ չհաջողվի նոր այբուբեն սովորել կամ մի քանի հազար նոր հիերոգլիֆներ անգիր անել, ապա ինչո՞ւ ես կարծում, որ կկարողանաս գործ ունենալ խելագար չարագործների կողմից առաջնորդվող փոքր բանակների հետ։

Իսկ եթե լուրջ, ռազմավարական նշանակության օտար լեզուները սովորելը ոչ միայն կօգնի գրավել հետախուզական գործակալությունների հավաքագրողների ուշադրությունը, այլև դիմորդների հերթում առաջ անցնել։ Միայն ամերիկյան ԿՀՎ-ն ամսական ավելի քան 10,000 մարդ է դիմում, սակայն նա, ով կապացուցի արաբերենի կամ չինարենի իր լավ իմացությունը, ավելի շատ նախապատվություն կունենա։

Ինչպես արդեն նշեցինք՝ այնպիսի լեզուները, ինչպիսիք են արաբերենը, չինարենն ու կորեերենը, դժվար է սովորել։ Հաջորդ ամենապահանջված լեզուն ռուսերենն է, որն ավելի հեշտ է։ Ինչևէ, կան պահանջված այլ լեզուներ, որոնք կարող եք սովորել, այդ թվում՝ պարսկերեն, քրդերեն, թուրքերեն, դարիերեն, ինդոնեզերեն։

Թերևս, հետախուզական գործակալությունների կողմից պահանջվող լեզուներից ամենահեշտն ինդոնեզերենն է։ Դրա պահանջն ամենայն հավանականությամբ կշարունակի աճել, քանի որ Ինդոնեզիան աշխարհի ամենախոշոր իսլամական պետություններից մեկն է բնակչության թվով, և այն ծովահենության խնդիրներ ունի։

Եթե, օրինակ, ընտրես ինդոնեզերեն սովորելը, ապա կընտրես մի լեզու, որը չունի հոգնակի թիվ, բայի ժամանակաձևեր կամ հոլովներ։ Իսկ ինչ վերաբերում է պարսկերենին ու դարիերենին, պետք է նշել, որ դրանք տարբերվում են այնպես, ինչպես ամերիկյան անգլերենը բրիտանականից, սակայն ԿՀՎ-ն դրանք առանձին լեզուներ է ընդունում, այնպես որ այստեղ դու առավելություն կունենաս՝ որպես երկու լեզուների տիրապետող։

Եթե լեզուները քո բանը չեն, կամ եթե դու քեզ ավելի լավ ես դրսևորում ռազմական ոլորտում, ապա կարող ես դիմել հետախուզական ծառայության անցնելու՝ քո հենց այդ առավելությունն օգտագործելով։
Գաղտնիք չէ, որ հետախուզական ծառայություններն իրենց Գաղտնի ծառայության վարչության համար ռազմական ոլորտի մարդկանց են հավաքագրում։
Սակայն պետք է հաշվի առնել, որ միայն այն փաստը, որ դու զինվորական ծառայություն ես անցել, դեռ չի նշանակում, որ դու միանգամից կհամալրես հետախուզական ծառայությունների թիմը։ Ամերիկյան ԿՀՎ-ն գաղտնի ծառայությունների թիմը համալրելու համար գործակալներ է հավաքագրում նավատորմի «Ծովային փոկերի» ջոկատից, «Դելտա» ռազմական ջոկատից ու Օդուժի պարաշյուտիստների ջոկատից։ Այնպես որ, հետախուզության ծառայության մեջ ներգրավվելու համար անհրաժեշտ է լուրջ ռազմական պատրաստվածություն ունենալ։

Նույնիսկ եթե Հատուկ ծառայությունների անդամ լինելու տեսակի մարդ չես, գաղտնի ծառայության վարչությունում բավականաչափ պաշտոններ կարող են գտնվել քեզ համար։ Միգուցե ինչ-որ բան պայթեցնելու փոխարեն դու ավելի հարմար ես հին կամ նոր ծանոթներից տեղեկատվություն կորզելու համար։ Իսկ դրա համար դու պետք է սրամիտ լինես, օժտված լինես հմայքով և միջազգային լուրջ փորձառություն ունենաս։

Ուսումնական մեկ կիսամյակն արտերկրում կարող է որպես սկիզբ ծառայել, իսկ տարբեր երկրներում լուրջ փորձառությունը կարող է որպես մեծ առավելություն դիտարկվել։ Ի վերջո, ո՞վ կարող է ավելի լավ կատարել գործն օտար միջավայրում, եթե ոչ նա, ով բավականաչափ ժամանակ է անցկացրել և ծանոթ է այդ մշակույթին։

Նույնիսկ եթե փորձառությունդ, օրինակ, Թուրքիայում կամ Ադրբեջանում չի անցել, դու կարող ես օգտակար լինել հետախուզության համար։ Դու արդեն գիտես, թե ինչպես շարժվել տարբեր մշակույթներում առանց օտարականի տեսք ունենալու:

Իհարկե լավ մարզավիճակում լինելը կարևոր է դաշնակից երկրից ուրան գողացողներին հետապնդելու համար, սակայն նույնիսկ գրասենյակային աշխատանքի համար, օրինակ, ամերիկյան ԿՀՎ-ն առողջ ու ճկուն գործակալներ է վարձում։ Եվ թիմի մաս կազմելու համար դու պետք է ազատված լինես բժշկական ծառայություններից օգտվելու անհրաժեշտությունից։ ԿՀՎ-ի գրասենյակները նույնիսկ իրենց աշխատակիցների համար նախատեսված հատուկ ֆիթնես կենտրոններ ունեն, որտեղ մարզվում են աշխատակիցները։

Մինչ այժմ մենք կենտրոնացանք հետախուզության որակական կողմերի վրա, սակայն նույնքան կարևոր է նաև հետախուզության քանակական բնույթը։ Դրա արդյունքում մաթեմատիկայի մասնագետներն ու համակարգչային գիտության գիտակները մեծ պահանջարկ են վայելում հետախուզական գործակալությունների համար։ Ինչևէ, միայն ահաբեկչական տեղեկատվական համակարգերը կոտրելուն չէ, որ սա վերաբերում է։ Կարևոր է նաև այն, թե ինչ են կարողանում այս մարդիկ անել տեղեկատվության հետ ծածկագրության տեսանկյունից։ Հարկավոր է չափազանց բարդ ծածկագրեր ստեղծել, որոնք հասկանալու համար երկրաչափության ու դիֆերենցիալ հավասարումների է անհրաժեշտ տիրապետել։

Մաթեմատիկան ու համակարգչային գիտության առարկաներին տիրապետելը հնարավորություն է տալիս ունենալ այս կարողությունը։ Նրանք ունեն նաև այս կոդերը ջարդելու և դրանց թաքնված տեղեկատվությունը կարդալու կարողությունը։ Այս դեպքում ծրագրավորման լեզուներով ու ալգորիթմերով զինված լինելն ավելի վտանգավոր է, քան զենքը։

Լեզվի և մաթեմատիկայի գիտակները միակը չեն, ում կարիքն ունեն հետախուզության ծառայությունները։ Վերլուծությունների փորձագետները նույնպես կարևոր դեր ունեն հետախուզության համար։ Այնպես որ, ցանկացած մասնագիտություն, որը վերլուծությունների հետ առնչություն ունի, կարող է ծառայել հետախուզության ոլորտ մտնելու համար։ Օրինակ՝ գիտության ոլորտի մասնագետները կարող են առաջնորդել որևէ երկրի կողմից կենսաբանական զենք արտադրելու կարողությունները վերլուծող թիմին, իսկ հաշվապահական կրթություն ունեցող մասնագետը կարող է գնալ ահաբեկիչների ֆինանսավորումների հետքերով։

Ինչևէ, բարդ իրավիճակներում քննադատական ու պարզ մտածողությունը կարևոր է հետախուզական բոլոր տիպի աշխատակիցների համար՝ վերլուծաբաններից մինչև դաշնային գործակալները։

Ակադեմիական ու պրոֆեսիոնալ փորձը միակ բանը չէ, որ անհրաժեշտ է հետախուզական ծառայություններ մուտք գործելու համար։ Բավականաչափ կարողությունը նույնպես կարևոր է։ Պատճառը պարզ է. պատմությունը ցույց է տվել, որ մարդիկ պատրաստ են իրենց երկրի գաղտնիքները վաճառել ոսկու և մեծ կանխիկ գումարի դիմաց։ Իսկ բավականաչափ կարողությունը կարող է հզոր հուշում լինել, որ դու ոչ մի արտաքին շարժառիթ չունես՝ քեզ վստահված գաղտնիքները բացահայտելու համար։

Գաղտնիության ու հավատարմության մասին նշելը, թերևս, անտեղի է, սակայն եթե դու ցանկանում ես ընդգրկվել հետախուզական ծառայություններ, ապա պետք է ամբողջովին պատրաստ լինես սրան։ Երբ դու առաջին անգամ աշխատանքի ես դիմում հետախուզական ծառայություն, քեզ զգուշացնում են, որ նույնիսկ դիմումները պետք է գաղտնի պահվեն, իսկ երբ աշխատանքի ես ընդունվում, քո յուրաքանչյուր քայլը պետք է պատրաստ լինես հայտնել ծառայությանը։

Ինչպես արդեն հասկացար՝ հետախուզության մեջ ներգրավվելու համար դու պետք է բավականաչափ պատրաստակամություն ունենաս և արդեն փորձես դիմել քո երկրի համապատասխան ծառայություններ, ինչպես օրինակ՝ ՀՀ պաշտպանության նախարարության հետախուզության վարչություն կամ Հայաստանի Հանրապետության անվտանգության ծառայություն։