Panorama.am-ը գրում է.
Գերմանական առաջատար die Welt պարբերականը հրապարակել է «Ճանապարհորդություն մի երկիր, որը պաշտոնապես գոյություն չունի» հոդվածը, որը թերթի թղթակից Էլիան Էհրենռայխի ճամփորդական նոթերն են՝ Լեռնային Ղարաբաղի Հանրապետություն կատարած այցելության մասին:
«Ոչ մի երկիր չի ճանաչել Լեռնային Ղարաբաղը: Զբոսաշրջիկների համար դա խոչընդոտ չէ. նրանց այստեղ վայրի բնապատկերներ ու հյուրընկալություն են սպասում: Սակայն ամենուր պատերազմի հետքեր են»,- հոդվածում գրում է հեղինակը՝ Արցախն անվանելով՝ «քրիստոնեական կղզի մուսուլմանական օվկիանոսում»:
Հոդվածագիրը Լեռնային Ղարաբաղ տանող ճանապարհից և շրջապատող բնությունից բացի, անդրադառնում է նաև Արցախյան հիմնախնդրին՝ հիշեցնելով պատերազմի փխրուն հրադադարի մասին: Հեղինակը նշում է, որ «այս նախկին անկլավը, որ վաղեմի ժամանակներից գրեթե բացառապես բնակեցված է եղել հայերով, Ադրբեջանն կորցրել է երկու տասնամյակ առաջ տեղի ունեցած պատերազմի արդյունքում»:
Անդրադառնալով երկրին՝ հեղինակը նշում է, որ տարածաշրջանը համարվում է կոնֆլիկտային, և այցելուների թիվը տարեկան հասնում է ընդամենը մի քանի հազարի: Վերջիններս նրա դիտարկմամբ՝ հիմնականում ծագումով հայեր են: Էլիան Էհրենռայխը ներկայացրել է երկու այդպիսի այցելուների՝ Գերմանիայում բնակվող Իննա և Նատալյա Մելումովաներին:
Հոդվածում հեղինակն անդրադառնում է ոչ վաղ անցյալի պատերազմական գործողությունների հետքերին, որոնք ըստ նրա, տեսանելի են ամենուր: Նա տեղեկացնում է, որ տարածքով գերմանական Սաարլանդ հողին կրկնակի անգամ գերազանցող Արցախի անվտանգությունը փխրուն խաղաղության պայմաններում պաշտպանում են 20 հազար զինվորներ:
Ամբողջական հոդվածը կարող եք կարդալ այստեղ