Ցրտերը ընկնելուն պես օրգանիզմը պահանջում է ավելի շատ էներգիա, որպեսզի տաքացնի մարմինը: Այդ պատճառով էլ մեզանից շատերը աշնանը և ձմռանը հակվում են կալորիական ուտելիքներին: Սակայն այդպիսի մթերքներն ավելի շատ վնաս են բերում, քան օգուտ: Եվ ոչ միայն մարմնակազմությանը, այլև առողջությանը: Healthinfo-ն առաջարկում է ծանոթանալ այն վիտամիններին, որոնք անհրաժեշտ են օրգանիզմին աշնանը և ձմռանը ցրտերին դիմանալու համար:
Առաջին հերթին հարկավոր են B խմբի վիտամիններ:
В1 (տիամին)
Տիամինը չի կուտակվում օրգանիզմում: Այն անհրաժեշտ է անընդհատ լրացնել: Դրա պակասությունը կարող է ազդել մեր տրամադրության և ինքնազգացողության վրա:
Տիամինի աղբյուր են վարսակը, հնդկացորենը, գետնանուշը, ցորենը, հատիկաընդեղենը, անտառային ընկույզները, ինչպես նաև խոզի, ոչխարի և թռչնամսերը:
В2 (ռիբոֆլավին)
В2 վիտամինի պակասությունը օրգանիզմում անմիջապես զգացվում է` ամբողջ մարմնում ցրտի զգացողություն, սառը ոտնաթաթեր և ձեռքի ափեր, ոտքերում և թիկունքում ցավ: Այն կարող է բերել նաև մազաթափության և անեմիայի:
В2 վիտամին պարունակում է սոճու ընկույզը, լյարդը, նուշը, շամպինիոնը, ձուն, պանիրը, կոճղասունկը, սկումբրիան, սնկերը, կաթնաշոռը, մասուրը:
В10 (պարաամինոբենզոնաթթու)
В10 վիտամինը նույնպես չափազանց կարևոր է օրգանիզմի համար ցուրտ ժամանակ: Այն պաշտպանում է մեզ շրջապատի բացասական ազդեցությունից:
Մրսելու սեզոնին В10-ը պարզապես անփոխարինելի է: Այն օրգանիզմում ձևավորում է ինտերֆերոն պաշտպանիչ սպիտակուցը, որն օրգանիզմին ուժ է տալիս վարակների դեմ պայքարելու համար:
В10-ը պաշտպանում է նաև մազերը չորությունից, իսկ մաշկին տալիս է առաձգականություն և հարթություն:
В10 վիտամին պարունակում են խմորիչը, սնկերը, բրինձը, ամբողջական ցորենի ալյուրը, կարտոֆիլը, գազարը, սպանախը, մաղադանոսը, ընկույզը, կիտրոնի բալասանը և արևածաղկի սերմերը:
В12 (ցիանոկոբալամին)
В12 վիտամինը պատասխանատու է թթվածնով արյան հարստացման համար և փրկում անեմիայից: Օրգանիզմում В12-ի պակասը ազդում է հիշողության, դեմքի գույնի վրա և առաջացնում ընդհանուր թուլություն:
В12 վիտամին պարունակում է լյարդը, սկումբրիան, սարդինան, նապաստակը, ութոտնուկը, տավարի միսը, պերկեսը, խոզի և ոչխարի մսերը, ձողաձուկը, կարպը և հոլանդական պանիրը:
С վիտամին
С վիտամինը ամրացնում է իմունիտետը և օրգանիզմին ուժ է տալիս պայքարելու հիվանդությունների դեմ: Այն նաև կարգավորում է նյութափոխանակության գործընթացը և անհրաժեշտ է բջիջների և հյուսվածքների աճի համար:
С վիտամին պարունակում է լոռամրգին, ցիտրուսային մրգերը, թթու կաղամբը, ծիրանի չիրը, սալորաչիրը, չամիչը:
Վիտամին D
D վիտամինը հիմնականում սինթեզվում է արևի ճառագայթների ազդեցության տակ: Դրա պակասությունը ազդում է կալցիումի յուրացման վրա, ինչի հետևանքով թուլանում են ոսկորները, եղունգներն ու մազերը և խնդիրներ են առաջանում մազերի հետ:
Վիտամին D պարունակում են պերկեսը, ձուն, լյարդը, կարագը, թթվասերը, կաթի սերը:
