Տանը
- Մամ, այսօր Երևանի տոնն էր, մեզ դպրոցից տարել էին էքսկուրսիայի:
- Որտե՞ղ էին տարել, բալես:
- Երևանի ճարտարապետական կոթողները տեսնելու:
- Ի՜նչ լավ է: Իսկ Մատենադարան գնացի՞ք:
- Չէ մամ, ի՞նչ Մատենադարան, հո դու հետամնաց չես:
- Բա որտե՞ղ եք գնացել:
- Դալմա Գարդեն Մոլ: Պատկերացնու՞մ ես, մամ, դա Հայաստանի առաջին մոլն է: Քաղաքապետարանը այն ներառել է մշակութային հուշարձանների շարքում:
- Իսկ էլ ու՞ր գնացիք, տղա՛ս:
- Հրազդան մարզադաշտի ավերակները տեսնելու:
- Ինչու՞, Հրազդան մարզադաշտը դեռ չե՞ն վերանորոգել:
- Չեն վերանորոգելու, թողնելու են այդպես ավերակ՝ հայկական ֆուտբոլին համահունչ լինելու համար:
- Ի՞նչ է դա նշանակում:
- Չգիտեմ մամ ջան, մարզադաշտի մուտքի վրա էր այդպես գրված:
Լուրեր
Այսօր Երևանի տոնի կապակցությամբ նախկին Ազգային պատկերասրահի շենքում իր հանդիսավոր դռները բացեց Երևան Սիթի սուպերմարկետների թվով 100-րդ մասնաճյուղը: Քաղաքացիների հոծ բազմությունը վաղ առավոտից հավաքվել էր սուպերմարկետի դիմաց՝ օգտվելու տոնական զեղչերից: Մեր թղթակիցը զրուցեց սուպերմարկետի բացմանը ներկա, դերասան Վհատ Սոխակյանի հետ, ով ասաց.
- Տո բացելու ենք, չուզողի աչքն էլ հանելու ենք:
- Պրն. Սոխակյան, բայց չէ՞ որ Ազգային պատկերասրահը մշակութային օջախ էր:
- Գիտեք ինչ, սուպերմարկետն էլ նոր տիպի մշակութային օջախ է, որտեղ գալիս են տարբեր մշակույթի տեր մարդիկ, գնումներ են կատարում, շփվում են միմյանց հետ: Պետք է ժամանակին համընթաց քայլել:
- Բայց սուպերմարկետները առատության պատճառով փակվում են փոքրիկ խանութները, փոքր և միջին բիզնեսը տուժում է: Մարդիկ դրանով էին հաց վաստակում:
- Փոքրիկ խանութները անհարմարավետ են: Ես ուզում եմ, որ իմ երեխան սուպերմարկետում գնումներ կատարի, սայլակի մեջ նստած հիանա լույսերի փայլերով և լավ ժամանակ անցկացնի: Սուպերմարկետը ոչ միայն խանութ է, այլև մշակութային օջախ և ժամանցի վայր: Իսկ փոքրիկ խանութներում դա չկա:
Անուղեղ TV
- Բարի երեկո սիրելի հեռուստադիտող, այսօր «Ուղեղի ցնցում» հաղորդաշարի հյուրն է Երևանի տոնակատարության կազմակերպչական հարցերի պատասխանատու Էրեբուհի Քանդակյանը: Տիկին Քանդակյան, ի՞նչ միջոցառումներ են նախատեսվում այսօրվա տոնի հետ կապված:
- Նախ ասեմ, որ այս տարվա տոնի խորագիրն է՝ Երևան. իմ սրտի մոլաքաղաք:
- Իսկ ինչու՞ հենց մոլաքաղաք:
- Որովհետև, այսօրվա տոնակատարության գլխավոր արարողությունը Օպերա մոլի բացումն է՝ Օպերայի և բալետի ազգային ակադեմիական թատրոնի շենքում, որտեղ խանութներից բացի կլինեն նաև կաֆեներ, գիշերային ակումբ, սելֆինարիում:
- Ի՞նչ է սելֆինարիումը:
- Դա մի տեղ է, ուր մարդիկ գալիս են սելֆի անելու՝ մարմնի ամենատարբեր մասերի հետ:
- Իսկ ուրիշ ի՞նչ միջոցառումներ եք ծրագրել առաջիկայում:
- Նախ ասեմ, որ քաղաքացիների անհարմարավետությունը քչացնելու համար մենք ասվալտապատել ենք բոլոր խոտածածկ տարածքները, իսկ մինչև տարվա վերջ բոլոր այգիները քաղաքից դուրս կբերենք:
- Երևանից դու՞րս:
- Այո, ըստ նոր օրենքի, բոլոր այգիները և կանաչ տարածքները պետք է գտնվեն Երևանից 100 կմ հեռավորության վրա:
- Բայց ինչու՞:
- Սա ՀՀ կառավարության որոշումն է, որպեսզի երևանցիները այգիներ գնալու համար այցելեն մարզեր և մարզերը ևս աշխուժանան: Մեր խորագիրն է՝ ԵԱԿՏ:
- Ի՞նչ է դա նշանակում:
- Երևանը Առանց Կանաչ Տարածության: