ԱՆԹԻԼԻԱՍ. Զուիցերիա կատարած իր պաշտօնական այցելութեան ընթացքին, իմանալով Ղարաբաղի ու Հայաստան-Ատրպէյճան սահմանագիծին վրայ բախումներու ժամանակ ինկած հայոց բանակի զոհերուն մասին՝ Արամ Ա. վեհափառ հայրապետը հետեւեալ յայտարարութիւնը կատարեց.
«Խոր ցաւով իմացանք մեր զինուորներուն մահուան մասին: Անոնց ընտանիքներուն կը յայտնենք մեր խորազգաց ցաւակցութիւնը եւ հայրական սէրն ու օրհնութիւնը: Մեր զինուորները հերոսներ են ու նահատակներ, որովհետեւ անոնք հայրենիքին, մեր անկախութեան ու իրաւունքներուն համար իրենց արիւնը թափեցին:
Մեր ամբողջական զօրակցութիւնը կը յայտնենք մեր քաջարի բանակին: Հայոց բանակը երաշխիքն է մեր հայրենիքի ապահովութեան ու անկախութեան: Հզօր բանակ՝ կը նշանակէ հզօր հայրենիք: Վստահ ենք, որ քաջ զինուորները վերանորոգ մարտունակութեամբ ձախողութեան պիտի մատնեն Ղարաբաղի հողային տարածքին մօտենալ փորձող թշնամիին բոլոր տեսակի ճիգերը»։
