Ամբողջ օրվա ընթացքում շատերիս մոտ անթաքույց տիրում է գեղեցիկ և օրինաչափ, հաճելի աշնանից դեպ ձմեռ անցման ռոմանտիկ տրամադրությունը: Իհարկե, նաև ձնառատ ձմռան ակնկալիքով, քանի որ հայտնի բան է, որ երբ ձմեռը ձնառատ է լինում, ապա գյուղատնտեսական տարվա հաջողությունը մասամբ երաշխավորված է, հետևաբար նաև կարելի է հաջորդ տարի ինչ որ չափով ակնկալել պարենի հոգսի թեթևացում...
Անշուշտ, ցանկալի է, որպեսզի տարվա բոլոր եղանակներն էլ իրենց իրավունքների մեջ մտնեն ժամանակին և ժամանակին էլ դուրս գան այդ իրավունքներից: Սակայն ձմեռը իր ուրույն գեղեցկությամբ, իր հետ բերում է շատ հոգսեր, հոգսեր, որոնք մեր ժողովրդի համար դարձել են անբաժանելի ուղեկիցներ` գազի վարձ, վառելիքի հայթայթման խնդիր, էլեկտրաէներգիայի ծախսերի կրկնապատկում և այդպես շարունակ...
Էլ չեմ ասում այն մասին, որ որքան էլ փոխվեն ավանդույթներն ու մոտեցումները կապված ամանորյա տոների հետ, միևնույն է, չգրված օրենքով յուրաքանչյուրիս պարտքն է տոները դիմավորել, հաճախ <<մեջտեղից կիսվելով>>, բայց առատ սեղաններով և հիմնականում հանուն այն բանի, որ երեխաները իրենց նեղված չզգան, ինչ արած, մենք այդպիսին ենք...
Այնպես որ, ձմռան գալուստով ուրախանլուց բացի, հարկ է նաև հիշել, որ ձմեռը իր հետ բերելու է շատ խնդիրներ, այն մեծ թվով, ահռելի մեծ թվով ընտանիքների համար, որոնք ոչ թե հիանում են ձմռան գալուստով, այլ հայտնվում են մոլորության մեջ...
Թող ձմեռը բարեբեր լինի
