Tert.am-ը գրում է.
Եվրասիական տնտեսական միության անդամ երկրների հետ Հայաստանի ապրանքաշրջանառության ցուցանիշների անկումը հանրապետական պատգամավոր Գագիկ Մինասյանը օբյեկտիվ պատճառներով է պայմանավորում և նշում, որ եթե ՀՀ-ն ԵՏՄ-ին չանդամագրվեր, ապա շատ ավելի վատ տնտեսական վիճակում կհայտնվեր:
«ԵՏՄ պատճառո՞վ է եղել անկումը, իհարկե ոչ: Ավելին, եթե մենք չմտնեինք ԵՏՄ, ապրանքաշրջանառությունն էլ ավելի կպակասեր»-Tert.am-ի հետ զրույցում ասաց նա:
Հիշեցնենք, որ ՀՀ արտաքին առևտրաշրջանառությունն այս տարվա առաջին կիսամյակում նվազել էր 20.6 տոկոսով, ԱՊՀ երկրների հետ՝ 22.5 տոկոսով: Ռուսաստանի հետ ՀՀ առևտրաշրջանառությունը նույն ժամանակահատվածում նվազել է 21.9%-ով: Հայաստանից դեպի ԵՏՄ երկրներ արտահանման ծավալները ևս նվազել են. ՌԴ-ի պարագայում՝ 47.1%:
Ըստ Մինասյանի՝ պատճառը ոչ թե ԵՏՄ մտնելն է, այլ այն սանկցիաները, որոնք «պատուհասեցին Ռուսաստանին»:
«Ապրանքաշրջանառությունը պակասել է, որովհետև Ռուսաստանում ռուբլին ընկել է, այնտեղ տնտեսական սանկցիաներ կան և այլն, և այլն»,-ասաց նա:
Իսկ սանկցիաների պատճառը, հիշեցնում է, Արևմուտքի վերաբերմունքն է Ուկրաինայի հարցում: «Այսինքն՝ պատճառները Հայաստանի ներսում չեն»,-ասաց նա:
