10. Չարլզ Մենսոն
Չարլզ Մենսոնը հանդիսանում էր «Ընտանիք» աղանդի առաջնորդն, ու նրա ղեկավարությամբ ու անմիջական մասնակցությամբ նրա ղեկավարած կրոնական կուլտի մասնակիցները 1969 թվականին դաժան սպանությունների շղթա ձեռնարկեցին: Նրանց հանցագործությունները շոկային էին իրենց անիմաստությամբ ու դաժանությամբ: Մենսոնն ու իր հետևորդները դատապարտվեցին մահապատժի, որը, սակայն, փոխարինվեց ցմահ ազատազրկմամբ:
9. Ջեֆրի Դամեր
Դամերը նորագույն պատմության ամենազարհուրելի սերիական մարդասպաններից մեկն է: 1978-1991 թվականներին այս հրեշի զոհը դարձան 17 պատանիներ ու տղամարդիկ, որոնց նա հրավիրում էր իր տուն՝ հոմոսեքսուալ բնույթի զվարճանքներ խոստանալով, թմրանյութերի օգնությամբ անօգնական վիճակի էր հասցնում նրանց, ինչից հետո սեռական կապ էր ունենում արդեն անգիտակից վիճակում գտնվող զոհերի հետ: Հետո նա նրանց սպանում էր ու շարունակում էր սեռական ոտնձգություններն արդեն դիակների հետ: Բայց այսքանով էլ այս հրեշը չէր բավարարվում: Նա անդամահատում էր զոհերի մարմիններն ու ուտում էր նրանց մարմնի մասերը: Դամերը դատապարտվեց ցմահ ազատազրկման, սակայն բանտում նա երկար չապրեց՝ սպանվելով այլ դատապարտյալի կողմից:
8. Ջոն Ուեյն Գեյսի կրտսեր
Եվս մեկ սերիական մարդասպան, ով 1972-1978 թվականներին սպանել ու իր նկուղում թաղել էր 33 պատանիների, ում դիակների նկատմամբ սեռական ոտնձգություններ էր գործել: Նրա հանցագործություններն այնքան հրեշավոր էին, որ Գեյսիին դատապարտեցին 21 անգամ դատապարտեցին ցմահ ազատազրկման ու 12 անգամ՝ մահապատժի: Նրա կյանքին վերջ դրվեց 1994 թվականի մայիսի 10-ին՝ թույնի ներարկման միջոցով: Նույնիսկ մահանալուց առաջ նա զղջման ոչ մի նշույլ չցուցաբերեց, իսկ նրա վերջին բառերն ուղղված էին իրեն մահապատժի ուղեկցող հսկիչին, ում նա մասնավորապես ասել էր. «Կարող ես համբուրել հետույքս»:
7. Հիրոհիթո կայսր
Ճապոնիայի Հիրոհիթո կայսրը համեստ մարդ էր ու ավելի շատ հետաքրքրված էր օվկիանոսի կենսաբանական կյանքով, քան քաղաքականությամբ: Բայց հենց նրա իշխանության օրոք Ճապոնիան ձեռնարկեց արյունալի պատերազմների մի շղթա, որն առ այսօր քիչ է հայտնի աշխարհի այս մասում, քանի որ ավելի շատ ընդունված է ֆիքսվել Գերմանիայի վրա: Սակայն Ասիայում պատուհասը ոչ թե գերմանացի նացիստներն էին, այլ ճապոնացի միլիտարիստները, ովքեր միլիոնավոր չինացիների ու այլ ասիական երկրների բնակիչների կյանք խլեցին՝ ամենևին հետ չմնալով իրենց գերմանացի դաշնակիցներից: Այս ամենն արվեց Հիրոհիթո կայսեր անունով և նրա օրհնությամբ:
6. Սադդամ Հուսեյն
Նա իշխանության եկավ որպես ազատարար, ու ժողովուրդը սկզբում պաշտում էր նրան: Նրա իշխանության տարիներին Իրաքը գրանցեց աննախադեպ այնպիսի վերելք, որի հետ մասշտաբներով կարող է համեմատվել միայն դրա անկումը, ինչի մեղավորությունը մասամբ Սադդամինն է: Սադդամը, սակայն, պատմության մեջ կմնա որպես 20-րդ դարի ամենաարյունարբու բռնապետերից մեկը, ով չէր խորշում ոչ մի միջոցից իր թշնամիներին վերացնելու համար: Նրա իշխանության օրոք հազարավոր իրաքցիներ ենթարկվեցին ռեպրեսիաների, տասնյակ հազարավոր քրդեր զոհվեցին Սադդամի զորքի կիրառած քիմիական զենքի թունավոր ամպերում, հարյուր հազարավոր իրանցիներ զոհվեցին Սադդամի կողմից սանձազերծած Իրանա-իրաքյան սարսափելի ու արյունահեղ պատերազմում: Ի վերջո, Սադդամի կյանքին վերջակետ դրեցին նրա երբեմնի դաշնակից ու գլխավոր հովանավոր ամերիկացիները՝ մահապատժի ենթարկելով նրան 2006 թվականին:
5. Թեոդոր Բանդի
Թեդ Բանդին հավանաբար հանդիսանում է ԱՄՆ պատմության ամենադաժան ու «արդյունավետ» սերիական մարդասպանը: Ապացուցվել է նրա մեղավորությունը շուրջ 30 սպանություններում, բայց որոշ փորձագետներ հակված են համարելու, որ նրա զոհերի իրական թիվն անցնում է 100-ը: Զարմանալին այն է, որ Բանդին, ունենալով հոգեկան լրջագույն շեղումներ, հանդիսանալով սոցիոպատ ու սադիստ, կարողացել էր գիտական աստիճան ստանալ հոգեբանությունից, իսկ բնածին խարիզման ու հմայքը նրա մոտ այնքան ուժեղ էին, որ նրա զոհերից շատերը մինչև վերջին պահը չէին էլ կասկածում, որ իրենց ժպտացող այդ բարետես տղամարդու հետ սկսած ֆլիրտն իրենց կյանքի վերջին սխալն է լինելու: Բանդիի սարսափելի նախասիրություններից մեկը նրանում էր, որ նա հնարավորության դեպքում գլխատում էր իր զոհերին ու որպես հուշանվեր իր հետ էր տանում գլուխը: Նա չէր խորշում նաև նեկրոֆիլիայից ու կանիբալիզմից:
4. Ուսամա Բեն Լադեն
Ծնվելով արաբ միլիարդատերի ընտանիքում՝ Ուսաման ստացել է հիանալի կրթություն ու ոչնչի կարիք չի զգացել ողջ կյանքում, սակայն դա նրան չխանգարեց, որպեսզի հետագայում դառնա աշխարհի ամենահայտնի ու դաժան ահաբեկիչը: Ուսաման իր ահաբեկչական կարիերան սկսել է ամերիկացիների հովանավորության ներքո՝ մասնակցելով Աֆղանական պատերազմին, որտեղ նա ղեկավարում էր ամերիկացի ու պակիստանցի մասնագետների կողմից պատրաստված հատուկ իսլամիստական ստորաբաժանում, սակայն հետագայում նրա ու իր հովանավորների «ջրերը մի առվով չհոսեցին», կամ էլ ոմանք ուզում են, որ աշխարհն այդ կերպ կարծի, ու նա իր զենքերն ուղղեց ԱՄՆ-ի ու Արևմուտքի դեմ: Նրա անմիջական պատասխանատվության տակ են գտնվում մի շարք հնչեղ ահաբեկչական գործողություններ, ու եթե դրանց թվին գումարենք նաև 2001թ. սեպտեմբերի 11-ի ահաբեկչությունը, ապա դա Ուսամային կդարձնի աշխարհի ամենաարյունալի ահաբեկիչը: Ամերիկացիները պնդում են, որ սպանել են Բեն Լադենին հատուկ գործողության ժամանակ, սակայն այս վարկածի շուրջ արդեն բազմաթիվ դավադրությունների տեսություններ կան, ու քչերն են հավատում դրան, որովհետև Բեն Լադենի դիակն այդպես էլ երբեք ցույց չտվեցին:
3. Իոսիֆ Ստալին
Ստալինն իսկական հեղափոխականի ուղի է անցել՝ հոգևոր վարժարանի սանից դառնալով ավազակ, հետո հեղափոխական, հետո պարտիական, իսկ հետո՝ հզորագույն երկրի ղեկավար: Ստալինն իր ժամանակի իսկական որդին էր ու կրում էր խիստ բնորոշ հոգեկերտվածք: Նա խելացի էր, խորամանկ, հաշվենկատ ու հեռատես: Միևնույն ժամանակ նա դաժան էր, անողոք ու հիշաչար: Այս բոլոր հատկանիշների համադրությունը հանգեցրեց նրան, որ Ստալինի անուրանալի արժանիքների ու ձեռքբերումների կողքին երբեք չեն մոռացվի այն միլիոնավոր կյանքերը, որոնք աղճատվեցին ու կանգ առան Ազգերի հոր քմահաճույքով ու որոշումներով:
2. Հենրիխ Հիմլեր
Հիմլերը Նացիստական Գերմանիայի ամենաահասարսուռ կերպարներից էր ու ղեկավարում էր ՍՍ-ը և դրան կից բոլոր այն կառույցները, որոնք զբաղվում էին աշխարհի ամենամութ գործերով: Հիմլերը հանդիսանում էր հրեաների Հոլոքոսթի գլխավոր «ճարտարապետներից» մեկն ու ռասայական տեսության մոլի հետևորդ էր: Նա նաև տարված էր օկուլտիզմով ու միստիցիզմով: Հիմլերի խղճի վրա են հազարավոր ու միլիոնավոր անմեղ մարդկանց կյանքեր, որոնց ոչնչացնում էին ռայխսֆյուրերի հրամանով:
1. Ադոլֆ Հիտլեր
Ու վերջապես, պատմության մեծագույն չարագործներից մեկը՝ Ադոլֆ Հիտլերը, ով հանդիսանում է Երկրորդ աշխարհամարտի գլխավոր մեղավորն ու կազմակերպիչը: Հենց նրան պետք է պատասխանատու համարել ԵՀՊ-ի 54 միլիոն զոհերի համար, նա էր Հոլոքոսթի գլխավոր կազմակերպիչն ու մեղավորը, նրա տեսության վրա հիմնվելով էին անխնա ոչնչացնում բելառուսներին ու սլավոնական ծագման այլ ժողովուրդներին, և հենց նրա ռեժիմին զոհ գնացին այլ ազգերի միլիոնավոր ներկայացուցիչներ, այդ թվում՝ գերմանացիներ:
