Galatv.am-ը գրում է.
Հունգարիայի ոստիկանությունը հայտնել է 4 անձանց ձերբակալման մասին, երեքը Բուլղարիայի քաղաքացիներ են, մեկը՝ Աֆղանստանի, ովքեր կասկածվում են 71 փախստականների սպանության մեջ, որոնց դիերը հայտնաբերել էին Ավստրիայի արեւելյան շրջանում բեռնատարի մեջ,-հայտնում է BBC-ին:
Վիեննա տանող ճանապարհին հայտնաբերված բեռնատարում եղել են 59 տղամարդ, 8 կին եւ 4 երեխա: Նրանք բոլորը խեղդամահ են եղել:
Ավստրիայի Բուրգենլանդ տարածաշրջանի ոստիկանապետը՝ Հանս Պետեր Դոսկոցիլը, մամլո ասուլիսի ժամանակ հայտնել է, որ զոհվածներն, ամենայն հավանականությամբ, Սիրիայից գաղթած փախստականներ են եղել: Դիակների մեջ հայտնաբերել են սիրիական փաստաթղթեր:
Ավստրիայի ոստիկանությունից հայտնել են, որ այդ մարդկանց մահվան պատասխանատվություն կրելու է հունգարա-բուլղարական հանցախումբը, որը զբաղվում է փախստականների ապօրինի տեղափոխությամբ:
Հունգարիայում գրանցված բեռնատարի վրա փակցված է եղել թռչնամիս արտադրող Hyza ընկերության լոգոն: Երբ ոստիկանները ժամանել են, որպեսզի ուսումնասիրեն բեռնատարը, նրանք հայտնաբերել են քայքայվող դիակներ:
Միայն անցած ամսվա ընթացքում ԵՄ սահմանն անցել են ռեկորդային թվով փախստականներ՝ 107,5 հազար մարդ:
Ավստրիայի արտաքին գործերի նախարար Սեբաստիան Կուրցը BBC-ին տված հարցազրույցում ասել է, որ ԵՄ-ում փախստականների ընդունելության հետ կապված քաղաքականության հիմնական դրույթները չեն աշխատում:
