SHAMSHYAN.com-ի տեղեկություններով, քիչ առաջ Երևանի Միքայելյանի անվան վիրաբուժական հիվանդանոց է տեղափոխվել մոտ 30 տարեկան մահացած տղամարդու դի: Ինչպես հայտնում է ֆոտոլրագրող Գագիկ Շամշյանը, երիտասարդը վնասվածքն ստացել է կրծքավանադակի հատվածում հրազենից արձակված կրակոցից և, ըստ տեղեկությունների, նրան հիվանդանոց է տեղափոխել եղբայրը: Այս պահին ոստիկանությունը պարզում է, թե Հանրապետության որ մարզից է երիտասարդի դին տեղափոխվել հիվանդանոց,ինչից հետո էլ կպարզվի՝ ոստիկանության որ բաժինը և քննչական կոմիտեի որ ստորաբաժանումն է զբաղվելու այս առեղծվածային մահվան փաստով հարուցված քրեական գործով: Տեղի ունեցածը սպանությո՞ւն է, ինքնասպանությո՞ւն, թե՞ դժբախտ պատահար, Միքայելյանի անվան վիրաբուժական հիվանդանոց այցելած ոստիկաններն ու քննիչները կկարողանան պատասխանել հանգամանքները պարզելուց հետո միայն:
*** 09:50 Քիչ առաջ ֆոտոլրագրողը հայտնեց, որ ոստիկաններն ու քննիչները պարզել են՝ մահացածը հանդիսանում էր Կոտայքի մարզի Պտղնի գյուղի բնակիչ, 34-ամյա Արսեն Ազիզյանը և այս պահին նշված գյուղ է ժամանել ոստիկանության Կոտայքի մարզային վարչության օպերատիվ խումբը՝ մարզի ոստիկանապետ Սերոբ Հարությունյանի գլխավորությամբ: Ժամանել է նաև ոստիկանության Կոտայքի բաժնի օպերատիվ խումբը՝ բաժնի պետ Ալբերտ Մարգարյանի գլխավորությամբ: Տեղում են նաև Հայաստանի քննչական կոմիտեի Կոտայքի մարզային քննչական վարչության մեծ թվով քննիչներ՝ վարչության պետ Մհեր Վարդանյանի գլխավորությամբ: Ֆոտոլրագրողը հայտնում է նաև, որ նշված գյուղ են ժամանել նաև ոստիկանության քրեական հետախուզության գլխավոր վարչության աշխատակիցները՝ վարչության պետի առաջին տեղակալ Սամվել Ասատրյանի գլխավորությամբ: Հաշվի առնելով հանցագործության վտանգավորության աստիճանը՝ Պտղնի գյուղ է ժամանել նաև Կոտայքի մարզի դատախազ Վիգեն Միլիտոնյանը: Ոստիկաններն ու քննիչները պարզել են, որ Ա. Ազիզյանը մահացու հրազենային վնասվածքը ստացել է Պտղնի գյուղի Զանգվի ափին գտնվող ու իրեն պատկանող ձկնաբուծարանի տարածքում, երբ անհայտ անձը ավտոմատից կրակոցներ է արձակել նրա ուղղությամբ: Հայտնաբերվել են արյան հետքեր, որոնք սպանության վայրից ձգվում են մոտ 60 մետր մինչև ձկնաբուծարանի տարածքում տեղադրված վագոն-տնակ: Այս պահին Կոտայքի բաժնի քննիչները փորձագետի հետ դեպքի վայրի զննության աշխատանքներ են կատարում, որտեղ հայտնաբերվել է որսորդական մեկփողանի հրացան, 2 կրակված պարկուճ: Ֆոտոլրագրողը հայտնում է նաև, որ ոստիկանության և քննչական բաժնի մեծ թվով աշխատակիցներն էլ այս պահին գտնվում են Պտղնի գյուղի սկզբնամասում գտնվող հսկայական տան տարածքում, որը, ըստ հավաքվածների, Պտղնիի գյուղապետի մտերիմի տունն է:
*** 11:10 Քիչ առաջ ֆոտոլրագրողը հայտնեց, որ ոստիկաններն ու քննիչները տաք հետքերով, կարելի է ասել, բացահայտել են հանցագործությունը, և այս պահին կասկածյալը՝ Պտղնի գյուղի բնակիչ, 28-ամյա Արման Բաղդասարյանը ոստիկաններին և քննիչներին ընթերակաների ներկայությամբ մատնացույց արեց այն վայրը, որտեղ թաքցրել է հանցագործության գործիք ավտոմատը՝ ալյուրի պարկի մեջ, որտեղ կային նաև մեծ թվով փամփուշտներ: Գ. Շամշյանի տեղեկություններով՝ շինությունը պատկանում է Պտղնիի գյուղապետի ազգականին: Փաստի առթիվ հարուցվել է քրեական գործ՝ ՀՀ քր.օր.-ի 104 հոդվածի 1-ին մասի և 235 հոդվածի 1-ին մասի հատկանիշներով: Նշված վայր է ժամանել նաև Հայաստանի քննչական կոմիտեի վերահսկողության գլխավոր վարչության պետի տեղակալ Գագիկ Մարկոսյանը: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
