Այսօր որոշ լրատվամիջոցներով եւ ֆեյսբուք սոցիալական ցանցով տարածվեց լուսանկար, թե իբր Երեւանի փոխոստիկանապետ Վալերի Օսիպյանը ներկել է մազերը: Ավելին, որոշ օգտատերեր զարկ տալով իրենց երեւակայությանը, գրեցին, թե այս ամենը պայմանավորված է ոստիկանական համակարգում սկիզբ առած բարեփոխումներով: Մեր լրագրողի հետ զրույցում Երեւանի փոխոստիկանապետն անդրադառնալով այդ հրապարակումներին, նախ նշեց, որ լուրջ չի վերաբերում նման հրապարակումներին, եւ միայն կարող է ասել այն, որ իր մազերը ներկելու մասին հրապարակումները իրականությանը չեն համապատասխանում: «Ես արդեն երեք տարի է, ամեն օր այցելում եմ լողավազան, իսկ լողավազանի ջուրը հատուկ միջոցներով է լուծված, իսկ ես սովորություն չունեմ գլխարկ կրել լողավազանում, եւ այս իսկ պատճառով օգտագործում եմ հատուկ շամպույներ, որոնք թարմացնում են մազածածկույթը, եւ խնամում մազերը», ասաց Վալերի Օսիպյանը: Ինչ վերաբերում է նմանատիպ տեսակետ հայտնողներին, ապա Վ.Օսիպյանը նրանց խորհուրդ է տալիս զբաղվել սպորտով, քանի որ առողջ մարմնում է առողջ հոգին:
