Tert.am-ը գրում է.
Հռոմի Ֆրանցիսկոս պապը այսօր կոչ է արել «ողջամիտ կոնսենսուսի» գալ Հայոց ցեղասպանության հարցում, որը տեղի է ունեցել հարյուր տարի առաջ՝ Օսմանյան կայսրության օրոք, և ցանկություն է հայտնել «բուժելու վերքերը և արագացնելու ժողովուրդների միջև խաղաղություն ու հաշտեցում հաստատելուն ուղղված քայլերը», որին դեռ չեն հասել:
Ինչպես հայտնում է ABC.es-ը` EFE գործակալությանը հղումով, այս մասին Հռոմի պապն ասել է` ողջունելով Հայ կաթոլիկ եկեղեցու Հայրապետական Սինոդի (բարձրաստիճան հոգևորական ժողով) արքեպիսկոպոսներին, ովքեր Վատիկան են ժամանել` ներկա գտնվելու ապրիլի 12-ի Սուրբ պատարագին, որը մատուցելու է Ֆրանցիսկոս պապը:
Ինչպես հաղորդում է Սուրբ Աթոռը` Հռոմի պապն արքեպիսկոպոսներին հայտնել է, որ պատարագի ժամանակ կաղոթի զոհերի հիշատակի համար և կխնդրի, որ աստվածային ողորմությունն օգնի «բուժել բոլոր վերքերն ու քայլեր ձեռնարկել ազգերի միջև խաղաղություն ու հաշտություն հաստատելու համար, որոնք դեռ համաձայնության չեն եկել այդ վշտալի իրադարձությունների շուրջ»:
Կաթոլիկ եկեղեցու քահանայապետը իր ելույթում անդրադարձել է նաև Հայաստանում քրիստոնեության վաղնջական պատմությանը` դեռևս 301 թվականից, երբ Հայաստանը դարձավ քրիստոնեությունը որպես պետական կրոն ընդունած առաջին երկիրը: