Ռիտա Օրան հերթական անգամ զարմացրել է բոլորին իր համարձակ կերպարով։ Երգչուհին «The Voice»-ի ժյուրիի մյուս անդամների հետ միասին հյուրընկալվել էր Ալան Քարի «Chatty Man» հեռուստաշոուին։
Նա ներկայացել էր այս շոուին արծաթագույն կրծկալով, որի վրայից կոստյում հիշեցնող վերնազգեստ էր կրում։ Միայն թե կոստյումը կիսով չափ անթև էր, ինչի արդյունքում Ռիտա Օրայի լանջերն այնքան պարզ էին երևում, որ երգչուհին ինքն էլ փոքր-ինչ կաշկանդվում էր դրանից։
Բոլորի ուշադրությունը կենտրոնացած էր մի կետի վրա, ավելի ճիշտ՝ երկու։ Ինքներդ էլ հասկանում եք, թե որ կետերի մասին է խոսքը։ Հաղորդավարի մոտ էլ անակնկալ կերպով անկեղծության պահ սկսվեց. «Անգամ ես եմ նայում քո կրծքերին»։
Ռիտան ըմբռնումով է վերաբերվել իր հանդերձի հանդեպ դրսևորված բուռն մոտեցմանը.
Ես չգիտեի՝ բիկինի հագնել, թե կոստյում, ուստի ես որոշեցի համատեղել այդ երկուսը։
Ինչպես նշեց Will.i.am-ը, Ռիտան «կոստկինի» էր հագել՝ թե՛ կոստյում, թե՛ բիկինի, ավելի ճիշտ՝ ո՛չ կոստյում, ո՛չ բիկինի։
Օրերս նա լուսանկարիչների օբյեկտիվում էր հայտնվել մի շատ յուրօրինակ մարզահագուստով։ Նրա մարզական անդրավարտիքի վրա դրոշմված էր «Adidas» ընկերության ապրանքանիշը, սակայն ի տարբերություն սովորական մարզական տաբատների՝ այն շղարշե կտորից էր։ Ուշագրավ է, որ երգչուհին այսպես ասած պսևդոմարզական տաբատը կրում էր բարձրակրունկ կոշիկներով։
Այս հաղորդման ընթացքում էլ Ռիտա Օրայի օսկարյան զգեստի թեման չշրջանցվեց։ Երբ Ալանը հարցրեց, թե ինչու էր Ռիտան որոշել կարմիր գորգին կանգնել հենց այդ թափանցիկ զգեստով, Ռիտան պատասխանեց, որ ինքը գաղափար անգամ չուներ, որ զգեստն այդքան շատ էր թափանցում։ Այնուամենայնիվ, նա անմիջապես հավելեց.
Եթե հիմա բաց զգեստներ չհագնես, էլ ե՞րբ պիտի հագնես։
