Armlur.am–ը գրում է.
ՄԱԿ-ում ՀՀ մշտական ներկայացուցիչ Զոհրաբ Մնացականյանին մարտի 11-ին ընդունեց ՄԱԿ-ի Գլխավոր Քարտուղար Բան Կի-Մունը, որի ժամանակ ՀՀ դեսպանը նրան է հանձնել Հայոց ցեղասպանության 100-րդ տարելիցի համահայկական հռչակագրի տեքստը:
ԱԳՆ մամուլի ծառայությունից հայտնում են, որ ողջունելով դեսպան Մնացականյանին` ՄԱԿ-ի Գլխավոր քարտուղարը բարձր գնահատեց Հայաստանի ակտիվ ներգրավվածությունը միջազգային բազմակողմ գործընթացներում, ինչպես նաեւ ՄԱԿ-ի գրասենյակի աշխատանքներին ցուցաբերվող աջակցությունը:
Շնորհակալություն հայտնելով ընդունելության համար՝ դեսպանը Գլխավոր քարտուղարին փոխանցեց Հայոց ցեղասպանության 100-րդ տարելիցի համահայկական հռչակագրի տեքստը` թարգմանված ՄԱԿ-ի բոլոր պաշտոնական լեզուներով` նշելով, որ Հռչակագիրը միտված է ցեղասպանության դեմ համամարդկային պայքարի ամրապնդմանն ու զարգացմանը:
Դեսպան Մնացականյանը Գլխավոր քարտուղարին տեղեկացրեց Հայոց ցեղասպանության 100-րդ տարելիցին նվիրված միջոցառումների մասին` ընդգծելով դրանց կարեւորությունը ոճրագործությունների անթույլատրելիության վկայակոչման եւ ցեղասպանության կանխարգելմանն ուղղված հետեւողական ջանքերի ամրապնդման առումով: Դեսպան Մնացականյանը բարձր գնահատեց ցեղասպանության կանխարգելմանն ուղղված գործընթացներում ՄԱԿ-ի առանցքային դերակատարությունը` որպես համամարդկային եւ բարոյական արժեքների վրա հիմնված միջազգային կարեւորագույն նշանակություն ունեցող կառույց:
Զոհրաբ Մնացականյանը Բան Կի-Մունին տեղեկացրեց նաեւ Հայոց ցեղասպանության 100-րդ տարելիցին նվիրված «100 LIVES» նախաձեռնության շրջանակներում ս/թ. մարտի 10-ին Նյու Յորքում պաշտոնապես ազդարարված մարդասիրական «Ավրորա» մրցանակի մասին:
Ամբողջական հոդվածը կարող եք կարդալ այստեղ
