Pastinfo.am-ը գրում է.
Պոռնկագրական նյութեր կամ առարկաներ տարածելու մեջ մեղադրվող 54-ամյա տղամարդը դատապարվել է 300 000 ՀՀ դրամի չափով տուգանքի, իսկ այդ լուսանկարները տղամարդուց վերցրած և տարածած կինը՝ 200 000 ՀՀ դրամի:
 
Ըստ մեղադրանքի՝ տղամարդը 2014թ. մարտ ամսին սեռական հարաբերություն է ունեցել մի կնոջ հետ, որը տեսանկարահանել է լուսանկարչական ապարատով, ապա համակարգչում տեղադրելու միջոցով ցուցադրել է մեկ ուրիշ կնոջ ու նրան իրացրել 2 լուսանկար:
 
Մեղադրանք է առաջադրվել նաև այդ կնոջը, ով 28 տարեկան է: Վերջինս տղամարդուց վերցրել է պոռնոգրաֆիկ բնույթի այդ  լուսանկարները և գյուղում տարածելով նկարները՝ դրանք ցուցադրել է  հորեղբորը, ով էլ այդ մասին հայտնել է լուսանկարում պատկերված կնոջը:
 
Տղամարդուն և կնոջը մեղադրանք է առաջադրվել ՀՀ քրեական օրենսգրքի 263-րդ հոդվածի 1-ին մասով, նրանց երկուսի նկատմամբ որպես խափանման միջոց է ընտրվել չհեռանալու մասին ստորագրությունը:
 
Ամբաստանյալներն առաջադրված մեղադրանքում իրենց մեղավոր են ճանաչել, զղջացել, սակայն դատաքննության ընթացքում հրաժարվել են ցուցմունք տալ:
 
Նախաքննության ընթացքում տղամարդը հայտնել է, որ գաղտնի,  իրեն պատկանող լուսանկարչական ապարատով  տեսանկարահանել է իր և այդ կնոջ սեռական ակտը, որից հետո լուսանկարները զետեղել է իր համակարգչում ու ցույց տվել գործով մյուս ամբաստանյալին՝ նրան իրացնելով 2 լուսանկար:
 
Նախաքննության ընթացքում պարզվել է նաև, որ գործով ամբաստանվող կինն է իր ընկերուհուն՝ գործով տուժողին,  ծանոթացրել տղամարդու հետ:
 
Տուժող կինն էլ հայտնել է, որ փոխադարձ համաձայնությամբ է սեռական հարաբերություն ունեցել գործով ամբաստանյալի հետ, սակայն ինքը չի նկատել, որ վերջինս այն տեսանկարահանել է:
 
Դատարանն ամբաստանյալների պատասխանատվությունն ու պատիժը մեղմացնող հանգամանքներ է արձանագրել այն, որ անկեղծորեն զղջացել են, դրականորեն են բնութագրվում, իսկ ամբաստանյալ կինը խնամքին ունի մինչև 14 տարեկան երեխա:

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել