Slaq.am-ը գրում է․
Քաղաքացի Գեւորգ Ղ.-ի հաղորդման հիման վրա ՀՀ հատուկ քննչական ծառայությունում նախապատրաստված նյութերով ՀՀ քրեական օրենսգրքի 308-րդ հոդվածի 1-ին մասով հարուցվել է քրեական գործ:
ՀՔԾ մամուլի ծառայությունից հայտնում են, որ Գեւորգ Ղ.-ն հաղորդում է տվել այն մասին, որ գումարի բռնագանձման պահանջով հայցադիմում է ներկայացրել Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարան` ընդդեմ Անդրանիկ Մ.-ի: Մինչ հայցադիմում ներկայացնելը, ՀՀ ԿԱ անշարժ գույքի կադաստրի պետական կոմիտեից ստացված գրությամբ պարզվել է, որ Անդրանիկ Մ.-ին սեփականության իրավունքով պատկանել է անշարժ գույք: Հայցադիմումի հիման վրա դատարանը կիրառել է հայցի ապահովման միջոց եւ ՀՀ ԱՆ ԴԱՀԿ ծառայության միջոցով արգելանք է դրվել հիշյալ գույքի վրա:
Քաղաքացիական գործով կայացված վերջնական դատական ակտն օրինական ուժի մեջ մտնելուց հետո, բռնագանձման վերաբերյալ ինքը կատարողական թերթը ներկայացրել է ԴԱՀԿ ծառայություն, սակայն հետագայում պարզվել է, որ ԴԱՀԿ ծառայության կամ անշարժ գույքի կադաստրի պետական կոմիտեի կողմից կատարված անօրինական գործողությունների արդյունքում արգելադրված գույքն արգելանքից հանվել է, Անդրանիկ Մ.-ի անվամբ հաշվառված գույք չկա, ինչի հետեւանքով չի կատարվել դատարանի վճիռը եւ չի բռնագանձվել իրեն հասանելիք գումարը:
