Tert.am-ը գրում է․
Եթե, ինչպես հաղորդվում է, Թուրքիան փորձի արգելել ԱՄՆ-ից Ուկրաինա հեղուկ գազի առաքումները Բոսֆորի նեղուցի ծանրաբեռնվածության պատճառաբանությամբ, ապա դա նշանակում է 3 բան՝ պայմանավորվածությունը ձեռք է բերվել ՌԴ Նախագահի՝ Թուրքիա կատարած այցի շրջանակներում, այս պարագայում գործ ունենք ռուս-թուրքական հերթական ջերմացման և թուրք-ամերիկյան երկկողմ հարաբերությունների վատացման հետ:
Tert.am-ի հետ զրույցում այս տեսակետը հայտնեց քաղաքագետ Աղասի Ենոքյանը ՝ ընդգծելով.«Թուրք -ամերիկյան հարաբերությունները գտնվում են իրենց ողջ պատմության ընթացքում ամենավատ վիճակում»:
Իսկ սա, ըստ Աղասի Ենոքյանի, նշանակում է, որ ԱՄՆ-ը այլևս չունի Հայոց ցեղասպանության հարցում Թուրքիայի վրա ճնշումներ գործադրելու ազդեցություն:
Ինչպես տեղեկացնում է ամերիկյան Bloomberg գործակալությունը, այս առաքումներին խոչընդոտելու պատճառներից մեկը նաև այն է, որ Թուրքիան պատրաստվում է դառնալ Եվրոպային ռուսական գազը վաճառող հիմնական երկիրը և սրանով նա ի դերև է հանում առաջին հերթին Ուկրաինայի հույսը՝ այդկերպ լուծել իր գազային խնդիրներն այն բանից հետո, երբ Ռուսաստանի հետ չի կարողացել վերջնական լուծման հասնել գազի գնի շուրջ։
Ինչպես Tert.am-ի հետ զրույցում նշեց քաղաքագետ Ռուբեն Մեհրաբյանը, ներկայումս աննախադեպ վատ են ոչ միայն թուրք-ամերիկյան, այլև ադրբեջանա-ամերիկյան հարաբերությունները:
«Մենք տեսնում ենք, որ Էրդողանի ակնհայտ, բացահայտ հակաամերիկյան հայտարարությունների հետ կորելացվում են Ադրբեջանի ցինիկ և լկտի պատասխանները Պետդեպարտամենտի միանգամայն արդարացի քննադատությանը՝ կապված այս երկրում լրագրողների և քաղաքացիական ակտիվիստների ձերբակալությունների հետ: Մենք տեսնում ենք, որ համահունչ հայտարարություններ են թե՛ իմաստային, թե՛ ժամանակագրական առումով: Եվ կարծում եմ՝ ԱՄՆ-ը այս հարցում չի սահմանափակվի միայն Թուրքիայով և հարցեր կունենան նաև Ադրբեջանի հետ, ու այդ հարաբերություններն արդեն իսկ վատացել են, որովհետև հրապարակային հռետորաբանության մեջ աննախադեպ կոշտություն ենք տեսնում: Ըստ որում, երկուստեք»,-ավելացրեց նա:
Ինչ վերաբերում է թուրք-ամերիկյան հարաբերությունների վատացման ֆոնին Հայոց ցեղասպանության հարցում ԱՄՆ անսպասելի դիրքորոշումներին, ապա Ռուբեն Մեհրաբյանը կարծիք հայտնեց, որ հայկական գործոնը կլինի ԱՄՆ-ի կողմից Թուրքիայի վրա ճնշում գործադրելու գործիքներից մեկը և ոչ ամենակարևորը:
Ամբողջական հոդվածը կարող եք կարդալ այստեղ
