Ոչ իշխանական ուժերի երկրորդ հանրահավաքից անմիջապես հետո եղավ հայտարարություն, որ հայտնի են հետագա հանրահավաքի օրերը:
Մասնավորապես, հոկտեմբերի 24-ին «Հայ Ազգային Կոնգրես» կուսակցության գործադիր քարտուղար Ս. Աբրահամյանն իրազեկել է Երևանի քաղաքապետարանին, որ 2014 թվականի հոկտեմբերի 31-ին, նոյեմբերի 7-ին և նոյեմբերի 14-ին ժամը 16.00-23.00 Ազատության հրապարակում տեղի է ունենալու հավաք և հավաքի ընթացքում՝ ժ.19.30-ից Ազատության հրապարակ–Մաշտոցի պողոտա–Ամիրյան փողոց–Հանրապետության հրապարակ–Նալբանդյան փողոց–Թումանյան փողոց–Ազատության հրապարակ երթուղով երթ...
Այսօր, հոկտեմբերի 31-ին, լրագրողների այն հարցին, թե ե՞րբ է տեղի ունենալու եռյակի հաջորդ հանրահավաքը, ԲՀԿ պատգամավոր Նաիրա Զոհրաբյանը պատասխանել է. «Մենք դեռ չգիտենք, թե երբ կլինի հաջորդ հանրահավաքը»:
Լրագրողները ԲՀԿ պատգամավորից հետաքրքրվել են «Հայ Ազգային Կոնգրես» կուսակցության գործադիր քարտուղար Ս. Աբրահամյանի՝ հանրահավաքի օրերի հայտարարության վերաբերյալ: Նաիրա Զոհրաբյանը պատասխանել է. «Նման պայմանավորվածություն, որոշում և անգամ քննարկում չի եղել»:
Մի՞թե եռյակի ներսում տեղյակ չեն եղել, որ Աբրահամյանն իրազեկելու է քաղաքապետարանին առաջիկայում կայանալիք հանրահավաքների վերաբերյալ: Բնական է, որ Աբրահամյանն առանց ներքին քննարկումների չէր տեղեկացնի երեք հանրահավաքների օրերի մասին:
Պարզ երևում է, որ հոկտեմբերի 31-ի չկայացած հանրահավաքը եռյակի՝ ներքին տարաձայնությունների և ընդհանուր հայտարարի չգալու հետևանքն է: Իսկ այս հանգամանքը հաստատում է Նաիրա Զոհրաբյանի հայտարությունը:
Եռյակի ներսում անհամաձայնության առկայությունը բազմիցս նկատվել է քաղաքական պրոցեսներում, և այս անգամ ևս ապացուցվում է, որ այդ անդունդն այնքան է խորացել, որ ներսի ուժերից սկսել են միմյանց մեղադրել ոչ հավաստի հայտարարություններ անելու մեջ:
