Հունգարիա-Ադրբեջան գործարքը կարծես անակնկալի է բերել ողջ աշխարհին, համայն մարդկությանը: Տեղի ունեցածն իսկապես որ անցնում է մարդկության, բարոյականության և նույնիսկ քաղաքականության թույլատրելի բոլոր սահմանները: Համաձայն եմ, իսկապես զարմանալու է…. Բայց արի ու տես, որ կա աշխարհում մի ժողովուրդ, որ ոչ միայն զարմացած չէ, այլ ավելին՝ այդ "ազգերի" համար, խոսքս թուրքերի և ազերների մասին է, նման վարքագիծը համարվում է օրինաչափ: Ոչինչ այլևս չի զարմացնի ցեղասպանություն տեսած մի ժողովրդի, որը շուրջ մեկ դար թմբկահարում է աշխարհի բոլոր ամբիոնները՝ ասելով, խնդրելով, բացատրելով, որ հայ ժողովրդի արդարացի պահանջի բավարարումը կկանխի մարդկության դեմ ուղղված նման ոճրագործություններն ու հանցագործությունները:
Մեծարգո պրն. Օբամա այս իրադարձությունը Ձեզ էլ է կարծես զարմացրել, դուք էլ եք այն քննադատում: Կարծում եմ՝ իզուր, այն իսկապես տեղին չէ: Աշխարհի հզորագույն երկրներից մեկի առաջնորդը լինելով՝ պետք է, որ լավ գիտակցեիք, որ անպատժելիությունը նոր հանցագործությունների տեղիք է տալիս: Նկատեցիք արդյոք, որ Ձեր անհետևողականության և ցեղասպանությունը չընդունելու հետևանքով դուք էլ մի ապտակ ստացաք Ձեր գործընկերոջ ՝ Թուրքիայի կողմից, որին ատամներով պաշտպանում էիք: Չէ որ հենց վերջինիս ցուցումն էր Բաքվի նման վարվելակերպը՝ մեկ անգամ էլ փաստելու, որ թքած ունի ինչպես ամբողջ աշխարհի այնպես էլ Ձեզ վրա: Թերևս այս ամենը Ձեզ համար ընկալելի կլիներ այն դեպքում, երբ մի որևէ երկիր Սեպտեմբերի 11-ի տերորիստներին հերոսի կոչում շնորհեր: Դուք այդ երկիրը կջնջեիք քարտեզի երեսից: Թույլ մի տվեք, որ այդպիսի բան լինի, կանխեք այն՝ դատապարտելով մարդկության դեմ կատարված յուրաքանչյուր հանցագործություն: Մի մոռացեք, որ Ձեր նման ազդեցիկ երկրների դիրքորոշումից համայն աշխարհի խաղաղասեր մարդկանց ճակատագրերն են կախված:
