Մակեդոնիայում բնակվող դիզայներ Դրագան Տրենչևսկին ստեղծել է «Electrolux Mobile Kitchen»-ի (թարգմանաբար՝ Էլեկտրոլյուքս շարժական խոհանոց) նախագիծը։ Այս սարքն արտաքուստ շատ նման է նոութբուքի։ Այս սարքավորման մեջ համակցված են խոհանոցում օգտագործվող առաջին անհրաժեշտության բոլոր առարկաները՝ 4-աչքանի գազօջախ, կտրատելու շարժական տախտակ, քերիչ և այլն։ Այս սարքը ոչ միայն արտաքուստ, այլև ֆունկցիոնալ առումով է նոութբուք հիշեցնում։ Այս սարքը հնարավորություն է տալիս մուտք գործել ինտերնետ ու զանգեր կատարել։ Այն հագեցած է նաև տեսախցիկով։
«Electrolux Mobile Kitchen»-ը դեռևս սոսկ մտահղացում է, որը մինչ այժմ չի ստացվում կյանքի կոչել որոշ խոչընդոտների պատճառով։ Հիմնականում խոչընդոտ է հանդիսանում սարքը կերակրի մնացորդներից մաքրելու և դրա գերտաքացումը կանխարգելելու օպտիմալ եղանակների բացակայությունը։ Այնուամենայնիվ, ինքնին նախագիծն արդեն իսկ հուսադրող է, քանի որ մասնագետներն աշխատում են նոր լուծումներ գտնել Դրագան Տրենչևսկու մտահղացումը կյանքի կոչելու համար։
